Нетижаяр кьуна

2023-йисан сад лагьай паюна Дагъус­тандин агропромышленностдин хиле са жер­ге рекьерай рекъемар артух хьанва. Идакай РД-дин хуьруьн майишатдин ва недай суьрсетдин министерстводин пресс-къуллугъди хабар гузва.

ИкI, алай йисуз 224 агъзур гектардин мулкунал хуьруьн майишатдин магьсулар цанва. Им, алатай йисав гекъигайла, 2 агъзур гектардин гзаф я. Вири санлай тумар цанвай майданрин кьадар 375 гектардиз барабар я. Хъсан нетижаяр хьун патал агропромышленностдин хел хуьруьн майишатда ишлемишзавай техникадалди бес кьадарда таъминарнавай. Кьилди къачуртIа, сифтегьан ругуд вацра Дагъустандин аграрийри техникадин 107 уьлчме  маса къачунвай (санлай къачурла, абурун къимет 300 миллион манатдиз барабар я). Гьа са вахтунда лизингдин шартIуналдини техникадин 66 уьлчме маса къачуна (213 миллион манат).

Алай вахтунда Дагъустанда хиперин ва цIегьерин кьадар 5,8 миллиондив агакьзава: июлдин эвел кьилерай абурун кьадар 2,4 процентдин хкаж хьанвай — 5 миллионни 748 агъзур кьил. Еке карч алай гьайванрин кьадар 0,5 процентдин артух хьанва.

ГьакIни республикада къушарин кьадарни 5,4 процентдин артух хьанва — 4,2 миллион кьил. Хуьруьн майишатдин суьрсет гьялунин кьадар 7,8 процентдин артух хьанва. Дуьгуьдин бегьер 140 агъзур тонндив агакьун вилив хуьзва.

Идалай алава яз, республикада памбаг арадал гъидай эксперимент кьиле тухузва: ам 182 гектарда цанва. РД-дин аграрийрин илимдин центради и кардал гуьзчивал тухузва.

Саки 12 млрд манат

Дагъустан энергиядалди таъминарунин кIвалахдин дурумлувал артухаруниз талукь программа уьмуьрдиз кечирмишун патал саки 11,8 миллиард манат пул герек жеда. И серенжем 2025-йисалди кьилиз акъудун фикирдиз къачунва, — хабар гузва «Дагъус­тандин экономика» телеграм-каналди.

РД-дин энергетикадин ва тарифрин министр Марат Шихалиева къейд авурвал, рес­публикадин гьукумди уьлкведин гьукуматдивай и кар патал пулдин такьатар чара авун тIалабнава.

Адан гафаралди, региондин Кьили тамамарна кIанзавай  серенжемар тайинарнава ва абур уьлкведин энергетикадин минис­терстводихъ галаз санал веревирд авунин нетижада меслятдал атанва. Алай вахтунда винидихъ къейднавай месэла гьялун патал РФ-дин гьукуматди пулдин такьатар чара ийидай чешмеяр тайинарун вилив хуьзва.

ЦIийи завод эцигда

Дагъустанда 2024-йисуз 2 миллиард ма­натдин къиметдин кьадарда аваз гуьзгуьдин гъалар арадал гъидай завод эцигда. И проект кьилиз акъудунал «Каспийский завод стекловолокна» ООО машгъул жеда. РикIел хкин, и кархана Каспийск шегьерда 2017-йисуз регистрация авунай.

Виликамаз кьунвай гьисабралди, гележегда акъуддай гуьзгуьдин гъаларин къимет­, винидихъ къейднавайвал, 2 миллиард манатдиз барабар жеда. Сад лагьай этапдин сергьятра аваз, йиса 730 тонн продукция акъудда.

Гужлувал артухарда

Дагъустанда виридалайни чIехиди тир Чиркейдин гидроэлектростанциядал техника­дин жигьетдай цIийикIа туькIуьр хъувунин кIва­­лахар кьиле тухун — адан гужлувал артуха­рун пландик кутунва. Идакай «Дагъустандин экономика» телеграм-каналди хабар гузва.

ИкI, «РусГидро» компаниядиз гьар са гид­роагрегатдин гужлувал 250-далай 275 мегаваттдал кьван хкаждай планар ава.

ИкI, и ГЭС-дин кьуд агрегатдикай сад 2024-йисан декабрдин вацра ишлемишиз вахкун пландик кутунва.

Гьазурайди – Муса  Агьмедов