26-октябрдиз  Советрин Союздин вири­далайни жегьил Игит Абас Исрафилов рикlел хкуниз талукьарнавай мярекат Белиждин гимназияда шад гьалара кьиле фена.

Мярекатда Дербент райондин кьилин везифаяр тамамарзавай Наби Алиева,  адан  заместитель Садир Эмиргьамзаева,  Белиж поселокдин кьил Рамиз Гьабибулаева, дяведин, зегьметдин, яракьлу ва къанун-къайда хуьдай органрин ветеранрин Советдин председатель Гьуьсейн Яхшибаева, Дербент шегьердин ва райондин “афгъанвийрин” ветеранрин Союздин председатель Алекпер Расулова, аске­­р­ри-афгъанвийри, гимназиядин юнармейцийрин  дестейри муаллимри ва аялри иштиракна.

Абас Исрафилов дидедиз хьана 60 йис тамам хьанва. Райондинни  чкадин вилик-кьилик квайбурулай гъейри, и кьетIен  мярекатда иштиракиз Дагъустандин районрин, шегьеррин ва Россиядин регионрайни  аскеррин-интернационалистрин чlехи ­делегация атанвай. Абурун арада Абасахъ галаз санал женгера иштиракай Ханты-Мансийский автономный округдин Нефтеюганск шегьердин женгинин гьерекатрин ветеранрин Союздин ва “Патриот” тIвар алай  региондин общественный тешкилатдин  председатель Виктор Кузнецов,  Казбек райондай Гьасанов Гьасан, Къизлярдай Агьмедов Агьмед ва гьакlни Вирироссиядин ветеранрин “Женгерин стхавал” (боевое братство) обществодин Дагъустан Республикада авай  отделенидин председатель  Мусашейх Салманов,  Къизилюртдин аскеррин-интернационалистрин со­ветдин председателдин заместитель Дада Гьажиев, Къизилюртдин аскеррин-десантникрин Советдин председатель Ханбулат Салавов ва хейлин масабур авай.

Гимназиядин директор Нариман Шихмегьамедова шад мярекат ачухун малумарна ва сифте гаф  Наби Алиеваз гана.

“Къе чун Афгъанистанда кьиле фейи вакъиаяр рикlел хкиз Белиж поселокдин гимназияда кlватl хьун гьакlан дуьшуьшдин кар туш. Гимназиядиз Советрин Союздин Игит Абас Исрафилован тlвар ганва. Чна адан чlехи игитвилел дамахзава”, —  лагьана Н.Али­ева.

Мярекатдал Рамиз Гьабибулаев, Садир Эмиргьамзаев, Мусашейх Салманов, Ханбулат Салавов, автопробег тешкилай Дада Гьажиев  ва масабурни рахана.­

Къагьриман  Ибрагьимов