Гатфар къекъвезва дуьньяда…

Кьуьд алатна, дуьньяда чими ракъарни хъуьтуьл марфар гваз гатфар къе­къвезва. Гзаф чкайра, иллаки чи аранда, гатфари­ саки вири ихтиярар вичин гъиле кьунва. Чуьл­лер, там-тар, вацIарни кIамар уях жезва. Хейлин къушар чими уьлквейрай хквезва…

Инсанрини Яраз хейлин хъсан гьазурвилер аквазва. Виридилайни артух раиж жезвайди цIийивални михьивал я. Чуьллер, чил-цав михьи жезвайди хьиз, инсанрини чеб цIийи ийизва, кIвалера, куьчейра, майданрал, саларани багълара михьивилер ту­нин кIва­лахар тешкилзава. Куьгьне пек-палан, цIам-кIарас, маса жуьре амукьаяр санал­ кIватIна, абуруз цIаяр ягъунни гьа михьивилер артухарунихъ галаз ала­къалу крар я.

Гатфарин кьуьгъверар къарагъарун, тумар цун, хвалар акъашун — ибурни инсанри ийизвай цIийивилер, михьивилер тирдал шак алач.

Ярахъ галаз алакъалу маса хъсан адет — им инсанри чпин арайра алакъаяр цIийи хъуву­нихъ галаз алакъалу я. Хъел хьанвайбур меслят хъжеда. Зайиф, начагъ инсанрал кьил чIуг­вада. Абуруз куьмекар гун мадни кьетIен адет я.

Алай вахтунда чи къудратлу аскерри До­нбасс цIийи фашистрикай азад авунин, Ва­тандин сергьятар мягькемарунин махсус се­ренжем кьиле тухузва. И кардини чаз дикъет­­лу хьунин, сада-садан гъил кьунин, ­Ва­­­тандиз къуллугъзавайбуруз куьмекар ­гу­нин везифаяр артухарзава. Иллаки рухва­яр, гъуьлер, стхаяр телеф хьайибурун гуьгьуьл кьун, абуруз герек вири куьмекар гун лазим я.

Куьрелди, Яран сувар чун патал гзаф мет­лебринди я.

«Лезги газет»