Аялар бахчайра тайинаруниз талукь кьезилвилер (льгота) диде-бубади кIвалахзавай чкадилай, инвалидвал аваз хьунилай ва хизанда авай аялрин кьадардилай аслу жезва. Ихтилат нубат такьуна бицIек бахчада эцигунин кьезилвиликай физва.
Адетдин нубатда акъваз тавуна, аял бахчадиз тайинариз жедайбур ихьтин ксар я:
— ЧАЭС-да аварияр хьуникди хасаратвилер хьайибур;
— судьяяр, прокурорар, силисдин комитетдин къуллугъчияр;
— военный къуллугъчияр;
— полициядин къуллугъчияр, суддин приставар, ФСИН-дин къуллугъчияр; гзаф аялар авайбур;
— инвалид аял;
— 1, 2 лагьай группадин инвалидар тир диде-бубаяр.
Дагъустандин МФЦ-дин кьилин идарадин пешекарри хабар гайивал, аял бахчадиз тайинаруниз талукь кьезилвилерин сиягь региондин дережада мадни гегьенш хьун мумкин я. Месела, тамам тушир хизанра авай аялрини бязи кьезилвилерикай менфят къачузва. Къейдзавайвал, аял бахчада тайинарунин кьезилвилерикайни къайдайрикай галай-галайвал чкадин образованидин управленида ва аялрин бахчада чириз жеда.
Пушкинан картадикай
Гьар са жегьилди вичин Пушкинан картадин счетда авай 5 агъзур манат йисан эхирдалди харж авун лазим я. 1-январдилай тайинарнавай кьадар дегиш хъжеда, амма счетда амукьай такьатар цIийи йисандал алава хъийидач.
Къейдзавайвал, Пушкинан картадин куьмекдалди уьлкведа 44 агъзурдав агакьна экскурсийриз, выставкайриз, киносеансриз, тамашайриз ва концертриз физ жеда. Кинотеатрра билетрин тайин кьадар (лимит) кардик кутунва, Пушкинан картадин куьмекдалди билетриз 2 агъзур манат пул харж ийиз жеда. Жуван рикIиз кIани мярекат «культура.рф» порталда хкядай мумкинвал ава.
Пушкинан карта 14-22 йисан яшара авай жегьилриз талукь я. Ам туькIуьрайла, махсус картадин счетдиз 5 агъзур манат пул язава.
Карта туькIуьрун патал авуна кIани крар:
— “ГосуслугиКультура” мобильный приложение акъуд (и кар патал «Госуслуги» порталда тестикьарнавай учетдин кхьинар хьун герек я);
— жуваз кIанзавай карта хкягъа — виртуальный ва я пластикадин.
Виртуальный карта гьасятда приложенида гуда. Пластикадин карта къачун патал Почта Банкунин са отделенидиз фин герек жеда. И дуьшуьшда жував паспорт ва СНИЛС хьун чарасуз я. Пушкинан карта уьлкведа 7 миллиондилай виниз жегьилри туькIуьрнава.
Аялриз талукь универсальный пособие
Госдумадиз аялриз гудай универсальный пособие тайинарунин гьакъиндай законопроект вуганва. ЦIийи системадин хъсанвал квекай ибарат я? Къейдзавайвал, и къайда хкягъуникди какахьай гьалар арадал къведач, яни такьатар тайинарунин истемишунар вирибур патал садбур жеда. Мадни са регьятвал ам я хьи, универсальный пособие къачудайбуру анжах са арза вугун бес жеда. Виликамаз учетда акъвазай кIвачел залан дишегьлийривай исятда тайинарнавай кьадардилай гзаф такьатар къачуз жеда. Кьилди къачуртIа, яшамиш хьунин агъа кIанин кьадар тамамдиз къачуда. Пуд йисал кьван яшда авай аялриз талукь пособие ам хизанда шумуд лагьай аял ятIа, гьадалай аслу тушиз гуда.
«Лезги газет»
