Сулейман-Стальский районда машгьур академик, философиядин илимрин доктор, профессор, РАН-дин академик, Россиядин философиядин обществодин президиумдин, “Философиядин месэлаяр” ва “Философиядин илимар” журналрин редколлегийрин член, алим Алкьвадар Гьасан эфендидин неве Абдусалам Абдулкеримович Гьуьсейнован 80 йис тамам жезвай йикъарин вилик Алкадарскийдин тухумдикай фильм гьазурда. Идан гьакъиндай “Лезги газетдиз” муниципалитетдин администрациядин пресс-къуллугъди хабар гана.
И месэла веревирд авун патал са шумуд югъ идалай вилик райондин кьил Нариман Абдулмуталибов ННТ каналдин машгьур журналист Гуьлера Камиловадихъ галаз гуьруьшмиш хьана.
Нариман Абдулмуталибова къейд авурвал, Имам Яралиеван мергьяматлувилин “Умуд” фондуни тереф хуьналди, райондин администрацияди Дагъустандин ва Россиядин культурадикни илимдик еке пай кутур Алкадарскийрин машгьур тухумдиз бахшнавай документламишнавай фильм гьазурун планламишнава.
“Алкьвадар Гьасан эфенди, адан хизан ва тухум неинки са Алкьвадринди, Куьрединди, Дагъустандинди я, абур вири гьакI Россиядин халис рухваярни тир ва яз амукьни ийизва. Чи райондай акъатай кас дуьньядин дережада Россиядин илим вилик тухвайбурукай сад тирди хьун чи еке бахт я.
2014-йисуз районда Алкьвадар Гьасан эфендидин 180 йисаз бахшнавай илимдинни практикадин конференция кьиле фена ва а чIавуз “Асари-Дагъустан” ктаб цIийи кьилелай чап хъувуна. Конференциядин нетижайрал асаслу яз райондин такьатрин гьисабдай чIехи алимдин кIвалахдиз бахшнавай илимдин макъалайрин кIватIал акъудна. Гьа йисуз Алкьвадар Гьасан эфендидин музейдин директор Гьуьсейн Гьуьсейнован “Гасан Алкадари” ктаб цIийи кьилелай чап хъувуна. Алай вахтунда адан “Диван ал-Мамнун” ва “Джираб ал-Мамнун” эсерар урус чIалаз таржума авуна куьтягьзава”, — лагьана райондин кьили.
Гьеле 2009-йисуз намуслу, рикIер чIехи ватанэгьлийри, Мегьамед Ярагъидин хтулдиз гьуьрмет авун яз, Алкьвадрал Дагъустандин зурба алим-тарихчи, философ общественный деятель, просветитель, педагог ва шаир Алкьвадар Гьасан эфендидиз музей ачухна. Такьатар желб ва ам алай девирдин ва гележегдин несилриз пишкеш авурди машгьур общественный деятель ва меценат Имам Яралиев я. И музей эцигун патал гьа вахтунин къиметралди 15 миллион манат харжна.
Абдулсалам Абдулкеримович Гьуьсейнов — Россиядин алим — философ, этикадин рекьяй пешекар, философиядин илимрин доктор, Россиядин илимрин академиядин гьакъикъи член, Россиядин философиядин обществодин президиумдин, “Философиядин месэлаяр” ва “Философиядин илимар”, “Ахлакьдин фикиррин библиотекаяр” журналрин редколлегийрин член, йиса садра акъатзавай “Ахлакьдин фикир” журнал чап авуник кьил кутурди ва жавабдар редактор, И.Кантан, М.Оссовскаядин, А.Швейцеран, А.Шопенгауэран ктабрин редактор я. Адан кIвалахрин библиографияда 250-далай гзаф, гьа гьисабдай яз 15 монографиядин ва са жерге учебникрин тIварар гьатнава.
«Лезги газет»
