РФ-дин Гьукуматдин Кьил Михаил Мишустинан къарардалди, Россиядин школьникрив-выпускникрив цIи, 2020-йисуз, аттестатар ЕГЭ-дин имтигьанар галачиз вахкузва. ЕГЭ анжах вузрик экечIиз кIанзавайбуру вахкуда.
И карда школайрин муаллимри абуруз имтигьанриз гьазур жез онлайн къайдада куьмекда. Сузриз (училище, колледж) аттестатрин нетижайриз килигна, кьабулда. Имтигьанар вахкунин, яни чирвилерин нетижаяр кьунин адетдин къайда дегишарунин себеб цIи кьуд пата коронавирусдин инфекция чукIун хьана. Мажбуридаказ кьабулнавай кьетIен серенжемри аяларни абурун муаллимар ва диде-бубаяр садакай масадак акатдай хаталу азардикай хуьниз куьмекда.
Къейд ийин, Ахцегь районда цIи 252 аялди 9 (абуру ОГЭ вахкун лазим тир) ва 157 касди 11-классар куьтягьзава, абурукай 26 кас чпивай аттестатар вахчуз тахьай виликан йисаринбур я, 7 кас къизилдин медаль къачуз алахънава. ИкI, школа акьалтIарнавай 157 жегьилдикай цIи вузрик экечIун патал анжах 101-да ЕГЭ вахкудайвал я.
Дашдемир Шерифалиев
