И йикъара Сулейман-Стальский райондин кьил Нариман Абдулмуталибов Алкьвадрин хуьре цIийи школа эцигзавай майдандал фена. “Комплексное развитие сельских территорий” программадай Алкьвадрал алай аямдин кьве мертебадин, 110 кIелзавайдан чкаяр авай цIийи школадин дарамат эцигзава. И кар патал 1 гектардин майдан чара авунва.
КIвалахрин заказчик РД-дин “Дагсельхозстрой” ГКУ я. Эцигунар “Капитал” ООО пудратчи тешкилатди кьиле тухузва. Эцигунрин умуми къимет 122 482 миллион манат я. Адан 90 процент федеральный бюджетдай, 5,5 процент республикадин бюджетдай ва бюджетдинбур тушир фондарай гуда.
Къейд авун лазим я хьи, райондин мулкарал “Стальские сады” проект-миллиардник уьмуьрдиз кечирмишуни, кьилдин инвесторрин 500 миллион манатдилай виниз пул агропромышленный комплексдиз желб авуни, объект эцигунин проектдинни сметадин документар аваз хьуни, гьакIни меценатри пул гунин патахъай заминвал авайвили районди “Комплексное развитие сельских территорий” программада иштиракдай мумкинвиликай менфят къачуна.
Алай вахтунда эцигунрин объектдал учебный корпусдин бинеда бетон цунин кIвалахар кьиле тухузва.
Проектда образованидин хилен истемишунар, школадихъ махсус тадаракралди таъмин тир кабинетар, классар, спортдин зал, пищеблок, технический тадаракар хьана кIанзавайди гьисаба кьунва. Школадин гьаятда мини-футболдин ва волейболдин майданар жеда. Эцигунар алай йисан эхирдалди акьалтIарда.
Пудратчи тешкилатдин ва школадин руководствойрихъ яб акалайдалай гуьгъуьниз райондин кьил Нариман Абдулмуталибова динэгьлийрин, камалэгьлийрин, зурба алимрин ватанда алай аямдин школа эцигунихъ еке метлеб авайди къейдна.
— Халкьдин образование вилик тухунин, Дагъустандин педагогвилин фикир арадал гъунин карда еке роль къугъвай, Кьиблепатан Дагъустанда куьгьнебурукай сад тир школа Алкьвадрин хуьре 1838-йисуз эцигнай, — лагьана Н.Абдулмуталибова. — Гуьгъуьнлай зурба алим Алкьвадар Гьасан эфендиди светский школа ачухна. Анай вири дуьньядиз машгьур хьайи алимар, конструкторар, композиторар, писателар ва шаирар акъатна. Алай аямдин школа хьуни мадни дерин ва еридин чирвилер къачудай мумкинвал гуда, — алава хъувуна райондин кьили.
Къейд авуна кIанда, Алкьвадрал алай вахтунда кардик квай школа 1976-йисуз эцигнай. Ам ишлемишунин вахт фадлай алатнава ва чкIидай гьалдиз атанва.
Хазран Кьасумов
