22-августдиз Ахцегь райондин администрацияда муниципалитетда кардик квай терроризмдиз аксивал авунин комиссиядин нубатдин заседание кьиле фена. Алукьзавай кIелунин цIийи йисаз гьазур хьунин месэладиз талукьарнавай ам, сифте гаф рахуналди, райондин регьбер ва АТК-дин председатель Абдул-Керим Палчаева ачухна.
Заседанидал «КIелунин цIийи йисан вилик образованидин идарайрин дараматар хуьнин, аялрин хатасузвал таъминарунин серенжемар кьабулунин гьалар»; «Уьлкведа арадал атанвай четин шартIара жегьилрин арада терроризмдин идеологиядиз акси таблигъат гужлу авунин важиблувал» месэлаяр веревирдна, 2024-2028-йисара Россияда терроризмдин идеологиядиз акси комплексный план чкадал кьилиз акъудзавай гьалдин гьакъиндай КьакIарин хуьруьн администрациядин кьилин гьахъ-гьисабдихъ яб акална.
Заседанидал Россиядин МВД-дин «Ахтынский» МО-дин начальникдин везифаяр тамамарзавай полициядин подполковник А. Агьмедагъаева, райондин образованидин управленидин начальник Х. Эльдарова, культурадин управленида спортдин, жегьилрин политикадин ва туризмдин хилен начальник Гь. Парпачева докладар авуна.
А.-К. Палчаева терроризмдиз акси комиссиядин членрин дикъет школайра чирвилерин суварин мярекатар кьиле фидай вахтунда аялрин хатасузвал хуьнин серенжемар кьиле тухунал кьетIи гуьзчивал авун лазим тирдал желбна.
Дашдемир Шерифалиев
