Гьафтедин эвел кьилера Махачкъалада РД-дин Гьукуматдин Председатель Абдулмуслим Абдулмуслимован регьбервилик кваз яшайишдин жуьреба-жуьре хилериз талукьарнавай совещание кьиле фена. Анал мектебар кIелунин цIийи йисаз гьазур хьунин, Украинада кьиле физвай дяведин махсус серенжемдин иштиракчийриз ва абурун хизанриз куьмекар гунин, налогар кIватIунин, республикадин ЖКХ-дин къурулушди алукьзавай хъуьтIуьз гьазурвал акунин ва маса месэлаяр веревирдна.
Совещанидал региондин энергокъурулушдин диспетчеррин управленидин директор Мегьамед Шехагьмедова къейд авурвал, йисан эвел кьилелай инихъ Дагъустанда ишлемишнавай электроэнергиядин кьадар 7,8 процентдин гзаф хьанва. Адан гафарай малум хьайивал, цIи виридалайни гзаф электроэнергия июндин вацра ишлемишна ва адан кьадар алатай йисуз виридалайни гзаф электроэнергия ишлемишай августдин вацран рекъемдилайни артух хьана.
«Алай йисуз регионда электроэнергия ишлемишунин еришар аквадайвал гзаф хьанва. Эгер вилик квай йисара виридалайни пара электроэнергия августдин вацра ишлемишзавайтIа, цIи и кар июндин вацралай гатIунна. Мадни са кар: адет яз, виридалайни пара электроэнергия нянин сятдин 6-далай 7-далди ишлемишзавай, цIи лагьайтIа, — нисинин арада — сятдин 12-далай 1-далди», — къейдна М. Шехагьмедова.
«Электроэнергия ишлемишунин кьадар артух хьун квехъ галаз алакъалу я? Виридалайни пара гьи муниципалитетра ишлемишзава?..», — суал гана А. Абдулмуслимова.
Премьер-министрдин суалдиз М. Шехагьмедовавай тайин жаваб гуз хьанач, амма ада и кардин мумкин тир са жерге себебар къейдна.
Дуьм-дуьз себебар тайинарун патал А. Абдулмуслимова сад лагьай вице-премьер Манвел Мажонцаз республикадин гьар са муниципалитетда электроэнергия ишлемишуниз талукь тамам тир ахтармишунар кьиле тухун буйругъна.
Агьмед Магьмудов
