СВО-дин зонада НАТО-дин таъсирдик квай укронацистринни фашистрин хура игитвилелди акъвазнавай аскеррив мергьяматлувилин куьмекар агакьарунин карда Ахцегь район республикада кIвенкIве жергейра ава. «Ахцегь район» МР-дин кьил Абдул-Керим Палчаеван гуьзчивилик кваз цIи районэгьлийри са шумуд машиндин пар аскерриз игьтияж авай шейэрни недай-хъвадай суьрсет рекье туна. И карда райондин общественный тешкилатарни кьулухъ акъваззавач.
ИкI, и мукьвара Вирироссиядин «Женгинин стхавал» ватанпересвилин общественный тешкилатдин Ахцегь райондин хилен регьбер Руслан Сулеймановни РД-дин Общественный палатадин член Мегьамедрасул Сулейманов мергьяматлувилин нубатдин куьмекдин шейэр гваз Луганскдин областдиз фена. «Газель» машинда аскерриз савкьат яз лап игьтияжлу шейэр авай: эцигунрин материаларни алатар, утеплителарни полиэтилендин плёнкаяр, электрогенераторарни шнурар, маскироватдай сеткаярни месер, яд михьдай фильтраярни цин бакар, прожекторарни газдин пичер-баллонар, бегьлеяр, жунаяр (бинт), ичер, хъвадай «Аран» ятар ва маса затIар. Абур гьазуриз Руслан Сулеймановаз Ахцегьа Митгьедин Мурсалова, Рамидин Жигерова, Эрик Заманова, Ширин Рагьимова, Агъакерим Байрамова, Шимсидин Арухова, Вадим Алимова ва «Женгинин стхавал» тешкилатдин маса членри куьмекна, Мегьамедрасул Сулеймановаз — Гуьмбет райондин общественный гьа и тешкилатдин векилри.
Савкьатар гвай мугьманар Луганскдин областдин «Таманская» дивизиядин, гуьгьуьллубурун «Барс-оскол» корпусдин, Донецк шегьердин гьуьлуьн пияда 177-полкунин аскерри пара хушдиз кьабулна. Сувабдин и кар иллаки анра женгина авай дагъустанвийрин кьилин винизвал хьана. «Гьелбетда, чаз ина тIуьн-хъунни, яракьарни, яшайишдин герек шейэрни ава. ЯтIани, инсанрин патай къайгъударвал, рикIин чимивал гьамиша хуш я, ида чи ватанпересвилин руьгь мягькемарзава. Пара кьадар сагърай!» — лугьузва абуру.
— СВО-дин аскерриз савкьатар гваз зун жуван хушуналди 3-сеферда фенва, — лугьузва Руслан Сулейманова. Сифте кьве сеферда, анра гьалар лап къизгъин яз, чун частариз ахъайначир. Мергьяматлувилин куьмек аскеррин векилри кьабулна. Ноябрдин эхирра ва я декабрдиз чаз мадни СВО-диз мергьяматлувилин куьмек тешкилдай фикир ава. Электрогенераторар, утеплителар, полиэтилендин плёнкаяр, пичер ва иллаки аялрин кагъазар акурла, аскерриз пара хвеши хьана.
— Аквазвайвал, исятда чи общество, лугьун хьи, саки кьве патал пай хьанва: гужлу, фендигар душмандихъ галаз къати женгера Ватан патал чпин чанар къурбандзавай игитар ва, Россия метIерал акъвазариз кIанз, 3 йисуз давам жезвай дяведикай хабарни авачиз яшамиш жезвайбур. Нагагь Ватандин ЧIехи дяведин девирда икI хьанайтIа, низ чида чи кьисмет гьихьтинди жедайтIа… НАТО-дин, Западдин 50-далай гзаф уьлквеяр яракь гваз Россиядал элкъвенвай и дяве гьатта алатай дявейрилайни писди, хаталуди я. Фашистрин, нацистрин, дявекаррин аксина фронтни далу пад вири сад хьана, душмандиз рум гана кIани чкадал, гьайиф хьи, парабур гьеле ахвара ама. Къе вири ахварай аватдай, душман кукIварун патал гьарда вичелай алакьдай куьмекдай вахт я, — алава хъувуна РФ-дин «Женгинин стхавал» тешкилатдин Ахцегь райондин хилен кьили.
Дашдемир Шерифалиев
