5-октябрь… Докъузпара райондин Миграгърин хуьруьн агьалияр патал и югъ кьетIен сувариз элкъвена. Зияудин Зейналован тlва­­рунихъ галай юкьван мектебдин виш йис Муаллимдин йикъал ацалтна. И кар ана кlелай, кlвалахай вирибуру кьетlен, лишанлу вакъиа хьиз къейдна.

Мярекатда Докъузпара райондин кьил Абду­рагьим Алискерова, адан заместителар тир Салигь­ Гьажимурадова, Агьмед Агьмедова, РД-дин халкьдин духтур, медицинадин илимрин кандидат Азе­дин­ Эсетова, “Лезги газетдин” литературадин от­де­л­дин редактор, шаир Мердали Жалилова, До­къуз­пара райондин образованидин управленидин ИМЦ-дин заведующий Мадрид Магьмудова, район­дин про­ку­рор Мисбагь Назирова, райондин ЦРБ-дин­ кьилин духтур Шагьлар Бухсаева, Буйнакск ше­гьердин цементдин заводдин генеральный директор Заман Бабаева, Ахцегь райондин мировой судья Дуьгуьш Дуьгуьшева, РД-дин лайихлу муал­лим, Авадандин СОШ-дин виликан директор Азиз Магьсудова, сарарин тlвар-ван авай духтур Абдул­лагь Байрамова, Дербентдин казначействодин къул­лугъчи Уруж Бухсаева, эцигунрин тешкилатдин къуллугъчи Нуьс­рет Уьзденова, къунши вири хуьрерин делегацийри­, муаллимри, аялри, манидарри ва хейлин маса мугьманри иштиракна. Зулун чlи­мел гьавадизни килиг тавуна, мярекат гурлу­даказ кьиле фена.

Мугьманрихъ элкъвена тебрикдин гаф мектебдин директор Фазир  Абдуллаева лагьана:

— Гьуьрметлу ватанэгьлияр, мугьманар! Къенин югъ чи дереда чlехи вакъиадихъ галаз ала­къа­лу я. Муаллимдин дережа гьамиша кьакьанда ава. 1918-йисуз, а девирдин савадлу кас, маарифчи Байрам Байрамов себеб яз, адан кIвале Миграгърин мектебди сифте камар къачуна. Муаллимрин дестедик а чlавуз арифдар ксар мадни гзаф квай.

1924-1925-йисара лагьайтlа, жемятдин куьмекдалди Миграгъа сифтегьан мектебдин дарамат эцигна. Светский мектебдиз а чlавуз Абдуллагь Салманова ва Абдуллагь Саркарова регьбервал гана. Исят­да мектеб вичин тlварунихъ галай муаллим Зияудин Зейналован алахъунар себеб яз, 1935-йисуз 7 йисан мектеб патал цlийи ва гегьенш дарамат эцигна. Гьа икl, 1938-йисуз Докъузпарада адакай юкьван образованидин сад лагьай мектеб хьана. Гьави­ляй алатай девирра къунши хуьрерин агьалийрини ина кlелна. Халкьдин арада марифат чукlу­рунин, инсанар кlелунал желбунин карда лайихлувилериз килигна, З.Зейналоваз Да­гъустанда сифтебурукай яз Зегьметдин Яру Пайдахдин орден гана.

Директорди мектебдин уьмуьрдикай ихтилатайдалай кьулухъ гаф Докъузпара райондин кьил Абдурагьим  Алискероваз  гана.

— Гьуьрметлу Миграгърин жемят, муаллимар, мугьманар, аялар!

Райондин администрациядин, райондин Соб­ранидин ва кьилди жуван патай къенин шад югъ — муаллимрин сувар ва мектебдин виш йисан юбилей вирибуруз мубаракиз кlанзава. Миграгърин мектебда кlелай гзаф ксар алай вахтунда профессорар, илимдин къуллугъчияр, композиторар, шаирар ва маса жавабдар крариз регьбервалзавай лайихлу инсанар я. Ихьтин ватанэгьлийрилай исятда мектебда кlелзавай жегьил несилри чешне къачун лазим я. Агалкьунар хьурай квехъ! Мад сеферда мубаракрай! — лагьана райондин кьили.

Мярекат кьиле тухвай муаллим — тешкилатчи Эдгар Атемова малумарайвал, писатель, алим Гьаким Къурбаназ мярекатдиз хтун кьисмет хьанач, амма ада вири иштиракчийриз чими саламар ва тебрикар ракъур­нава. Хайи мектебдин сувариз талукь яз тебрикдин чар Дагъустандин халкьдин шаир Арбен Къардашани рекье тунвай.

Мярекатдал РД-дин халкьдин духтур Азедин Эсетова, “Лезги газетдин” литотделдин редактор Мердали Жалилова, райондин ЦРБ-дин кьилин духтур Шагьлар Бухсаева, Буйнакск шегьердай хтанвай Заман Бабаева, Махачкъаладай — духтур Абдуллагь Бай­ра­мова ва масабуру тебрикдин гафар лагьана.

Райондин образованидин управленидин ИМЦ-дин заведующий  Мадрид  Магьмудова  къейд авурвал, алай вахтунда Миграгърин юкьван мектебда 131 аялди чирвилер къачузва, 40 касди кlвалах­зава. ЕГЭ, ОГЭ вахкунин нетижайрай и мектебди районда пуд лагьай чка кьуна.

Ина тежрибалу, бажарагълу муаллимри зегь­мет­ чlугвазва. Алатай йисуз Ф.Абдуллаеван ва Ш.Аба­сован зегьмет “РФ-дин умуми образованидин­ лайих­лу работник” лагьай тlвар гуналди, гила мектебдин 100 йисан юбилейдихъ ва муаллимрин суварин йи­къахъ галаз алакъалу яз, муаллимар тир Ингьар Жу­мартован, Расул Расулован, Якъудин  Ра­жабован, Микаил Микаилован, Лида Абасо­вадин зегьмет­ “РД-дин образованидин отличник” знак, Руслан  Ражабован,  Роза  Къурбалиевадин, Мегьри Усмановадин агалкьунар РД-дин илимдинни образованидин министерстводин Гьуьрметдин грамота гуналди къейдна.

Суварин иштиракчияр патал и юкъуз райондин культурадин управлениди концерт тешкилнавай. Кьилди къачуртlа, иштиракчийри ашукь Къагьира, Роза ва Заира Чигниева­йри, Фатима Аллагьвердиевади, Эльза Ме­гьамедовади тамамарай манийрихъ яб акална, ачух майдандал кьуьлерна. Милли кьуьлердай “Каспий” ансамблди вичин алакьунар къалурна.

Мектебда кlелзавай аялри и хуьруьн шаирри теснифнавай шиирар устадвилелди кlелна.

Куругъли Ферзалиев