Редакциядиз чар
Гьуьрметлу «Лезги газетдин» редакция! Квез и чар кхьизвайди Мегьарамдхуьруьн райондин Гъепцегьрин хуьряй тир зегьметдин ветеран Гьажиметова Саласа я.
«Лезги газет» гьар гьафтеда зи кIвализ къвезвай мугьман я. Ам хтайвалди, вири кIвалахар туна, зун газет кIелиз ацукьзава.
Газетдай сифте «Кьилин редактордин гаф» рубрикадик кваз гузвай макъалаяр, литературадин отделдин чинар, Азедин Эсетован макъалаяр иллаки хушвилелди кIелзава. Дугъриданни, газетди чав республикадин хабарарни, чи ватанэгьлийрикай малуматарни агакьарзава. Сагърай газет акъудунал зегьмет чIугвазвай ксар!
И йикъара за Хуьруьг Тагьиран «Чибур я» шиир кIелзавайла, зи рикIел 2014-йисан 6-ноябрдиз акъатай газетдин 45-нумрада авай «Тарашзава, тарашзава, тарашзава» кьил ганвай макъала хтана. Адан автор зегьметдин ветеран Рамазан Велибегов я. За а макъала дикъетдивди кIелнай. Эхирдай авторди рагьметлу Алибег Фатагьован СССР хьтин Ватан тебрикай цIарарин бинедаллаз вичин саягъда кхьенвай шиир ганвай.
Зи фикирдизни, Хуьруьг Тагьиран «Чибур я» шиир алай девирдин гьакъикъатдихъ галаз кьадай саягъда туькIуьрун атана. Ингье а цIарар:
Вил вегьена килигайла чуьллериз,
Накъвар къвезва кесиб халкьдин вилериз.
Ван-сес амач я никIера, багълара,
«Лежбер» лугьур гаф къе амач япара.
Цуьк акъудна диганавай ерияр
Элкъвенва къе къараткенрин цацариз.
Нехирарни, рамагарни, суьруьяр
Эвезнава туьквенрини базарри.
КIвалахзавай жегьил чанар гьар сана
Ватандивай хьанва чеб лап яргъара.
Амач хуьре зегьметчийриз кархана,
Тарашчияр, ришветбазар бул хьанва.
Ачух рикIер, шадвиливди ргазвай,
Пашман хьана, ажугъдивди ацIанва.
Лугьуз тежез гьахъни батIул вуж ятIа,
Инсанвилин гьиссер къене цIразва.
Я гьахъ амач, я са къайда,
Намусдикай хьанва яргъа.
Тарашзава, къакъудзава,
Аллагь, вакай чаз са чара!
«Лезги газет»
