Алкьвадар Гьасанан — 190 йис
28-ноябрдиз СтIал Сулейманан районда международный дережада аваз чIехи алим Алкьвадар Гьасан эфендидин 190 йис тамам хьуниз талукьарнавай илимдин конференция кьиле фена. Ам РД-дин милли сиясатдин ва динрин крарин рекьяй министерстводи, муниципалитетдин администрацияди ва А. Гьасанан тIварцIихъ галай медениятдинни марифатдин центради тешкилнавай.
Конференция патарилай атанвай мугьманар Алкьвадрин хуьре авай арифдардин музейдиз финилай гатIунна. Асул мярекатар лагьайтIа, Кьасумхуьрел И.Тагьирован тIварцIихъ галай медениятдин маканда тухвана.
Иштиракчийрин арада Саудрин Аравиядай, Къиргъизистандай, Узбекистандай, Азербайжандай, Россиядин жуьреба-жуьре регионрай, шегьеррай атанвай мугьманар, Алкьвадар Гьасанан тухумдин векилар, алимар, тарихчияр, шаирар ва масабур авай.
Сегьнедилай мугьманар СтIал Сулейманан райондин кьил Саид Темирханова, РД-дин милли сиясатдин ва динрин крарин рекьяй министр Энрик Муслимова, Алкьвадар Гьасанан тIварцIихъ галай центрадин директор Мегьамед Ибрагьимова тебрикна.
Вичин рахунра Саид Темирханова Алкьвадар Гьасан эфендиди Дагъларин уьлкведин тарихда тунвай чIехи ирс, несилар патал адахъ авай метлеб къейдна. Адан гафаралди, алим дагъвийрин арада камаллу насигьатчи, меслятчи хьиз машгьур тир. Адаз Дагъустанда ва адалай къецени еке гьуьрмет авай.
Энрик Муслимован гафаралди, арифдардин илимдин ирс тамамдиз ахтармишна акьалтIарнавач. Ада иштиракчийрин фикир и жигьетдай еке кIвалах кьиле тухвана кIанзавайдал желбна.
Мегьамед Ибрагьимова Алкьвадар Гьасан эфендидин ирс ахтармишунал, ктабар таржума авунал анжах пешекарар машгъул хьун, акьалтзавай несилриз чи халкьдин кьегьал векилрикай дерин чирвилер хьун патал мектебра конкурсар, олимпиадаяр тешкилун герек тирди, республикадин меркезда алимдин тIварцIихъ центрадин чIехи дарамат эцигиз гатIунзавайди, центради цIи «Алкьвадар Гьасан» тIвар алай ктаб чапдай акъуднавайди къейдна. Мярекатдин сергьятра аваз, ада мукьвара СтIал Сулейманан райондин мектебра кIелзавай аялрин арада Алкьвадар Гьасанан уьмуьрдин ва яратмишунрин рекьиз талукьарна кьиле тухвай конкурсдин гъалибчийрив дипломар, пулдин пишкешар (10, 8 ва 5 агъзур) ва «Алкьвадар Гьасан» ктабар вахкана. Гъалибчийрин арада Шамсият Шихрагьимова (1-чка, Кьулан СтIалрин мектеб), Аминат Агьмедова (2-чка, Алкьвадрин мектеб) ва Фейруза Рамазанова (3-чка, Агъа СтIал-Къазмайрин мектеб) авай.
Гуьгъуьнлай, конференциядин сергьятра аваз, тарихдин илимрин доктор Замир Закарияев, Къиргъизистандин улемрин Советдин председатель Замир Ракиев, РАН-дин ДФИЦ-дин чIалан, эдебиятдин ва искусстводин Институтдин илимдин къуллугъчи Патимат Алибегова, алим Азиз Мирзебегов, Дагъустандин халкьдин шаир Сажидин Саидгьасанов ва масабур рахана.
Агьмед Магьмудов
