Гьар садаз малум я хьи, рухваяр дяведин махсус серенжемда авай диде-бу­байрин рикIер гъиргъирдал ала. Абуру Ватандин вилик буржи кьилиз акъудзавай кьегьалар сагъ-саламатдиз амукьун патал датIана дуьаяр ийизва. Абуруз уьмуьрда четин тахьун патал республикадин регьберди ва муниципалитетрин кьилери аскеррин хизанрин гьакъиндай къайгъударвал ийизва.

Дидейрин йикъан вилик СтIал Сулейманан райондин администрациядин кьил Саид Темирханов ва культурадин, образованидин управленийрин къуллугъчияр, жемиятдин ве­к­илар дяведин махсус серенжемда иштиракзавай ва телеф хьайи аскеррин дидейрихъ галаз гуьруьшмиш хьана.

— Чна мукьвал-мукьвал аскеррин хизанрихъ галаз гуьруьшар тешкилзава, — лагьана С. Темирханова,- гьавиляй чаз абурун вири къайгъуйрикай, дердийрикайни хабар я. Герек вахтунда куьмекни гузва. Гьар са аскердихъ вичин хизан, аялар ава. Абур кIеве гьатзавай дуьшуьшарни жезва. Инални квевай куь дердийрикай лагьайтIа, жеда,- элкъвена райондин кьил аскеррин дидейрихъ. — Гьа са вахтунда за квез Дидейрин югъни рикIин сидкьидай тебрикзава. Къуй Гъалибвилин югъни мукьвал хьурай!

Дидейриз чими келимаяр лугьунилай гъейри, абурув администрациядин ва жемиятдин организацийрин патай савкьатарни вахкана. Райондин гьевескарри авазрал­ди, манийралди дидейрин гуьгьуьлар ачухарна.

Чи  мухбир