Хуьруьн майишатдикай ихтилат кватайла, чи агрономар, арендаторар, фермервилинни лежбервилин хилера кIвалахзавайбур сифте нубатда магьсулдарвиликай рахада. Им дуьзни я, гьикI лагьайтIа, магьсулдарвал — им техил я. Техил хьайила, инсандиз сифте нубатда герекзавай ризкьи — фу жеда.
Эхиримжи вахтара СтIал Сулейманан райондин магьсулдарар и хел вилик тухуз, къачузвай бегьеррин кьадар артухариз алахъзава. Амма виридалай, рикIиз кIанзаватIани, сад хьиз алакьзавач. Мисал яз, “Куркент” АСПК-дин магьсулдарри кьуд-вад йисан вилик 300 гектардихъ галаз къуьл, мух цазвайди тир. Гила лагьайтIа, а майданар са паюнин тIимил хьанва. Имни шартIар четин хьунихъ галаз алакъалу я, лугьузва арендаторри. Ингье алатай зулуз са гужа-гуж 119 гектарда зулун магьсулар цаз алакьна.
Акьван тIимил вучиз хьанва лагьай суалдиз тежрибалу механизатор, магьсулдар Шайдаев Сефербега ихьтин жаваб гана:
— Куьмек авач. Техникадиз кудайди, ягъламишдай шейэр, запчастар — вири багьа хьанва. Акъакьзавач, я куьмекни авач, вири жуван хиве ава. За 38 гектарда техил цанва. Зулун магьсулар захъ галаз масадбуруни цанва. Анра къацар акьалтнава. Абур хуьн патал гьар юкъуз жув къаравулда акъвазна кIанзава…
Дугъриданни, жемятдин мал-къара хейлин тIимил хьанватIани, гьа амайбуруни къацариз зиянар гузва.
Идалайни гъейри, никIера кьифер гзаф ава, гьаниз килигна, магьсулдарар дарманар кутуниз мажбур я. ЯтIани кьиферин кьадар тIимил жезвач, къейдзава хуьруьн майишатдин зегьметчийри. Дарман незва, амма кьиф рекьизвач. Аквар гьаларай, дарманрин таъсир зайиф хьанва. И кардиз фикир ганайтIа, сагърай лугьудай дарманар маса къачузвай арендаторри.
— Чи участокарни гьакI я, — лугьузва арендаторар тир Тарлана, Нарима, Замира ва масабуру. Арендаторар гьахълу я. Авачир пул гана, багьа дарман къачузва, амма адакай хийир авач.
И месэлайриз вахтунда фикир тагайтIа, магьсулар цазвай майданар мадни тIимил хьунал къведа.
Райсудин Набиев, зегьметдин ветеран
