(Эхир. Эвел — 2, 4-6-нумрайра)

3

Вокалистар

Къейд. Мегьамед Гьуьсейнован ктабда лезгийрикай «академический пландин» са вокалистни жагъанач.  

Рагьимат Гьажиева

1909 – 1990

Ахцегьа дидедиз хьайи адан аял вахтар Бакуда акъатна. Рушан вокалдин чIехи алакьунри Азербайжандин классикадин музыкадин бине кутур Уьзеир Гьажибегован фикир желбна.

1924-йисуз Рагьимата Н. Нариманован тIварунихъ галай Дишегьлийрин муаллимрин семинарий куьтягьна. Дагъустандиз хтай ада Хунзаха ва Кьурагьа муаллим, халкьдин судья­ яз кIвалахна. Са вахтунда ам ДАССР-дин Верховный суддин членни тир.

1938-1969-йисара Даградиотелекомитетда солистка тир. Рагьимат Гьажиевади сифте яз советрин композиторрин эсерар Дагъустандин халкьарин, мадни урус ва азербайжан чIаларал тамамарна. Дяведин йисара концертрин бригададик кваз госпиталра, армиядин частара концертра иштиракна.

Дагъустандин искусстводинни литературадин Москвада кьиле фейи кьве декадада (1950 ва 1960-йисара) иштиракна. Советрин композиторрин маниярни романсар виридалайни хъсандиз тамамарунин Вирисоюздин конкурсдин дипломант хьана (1956-йисуз, Москва).

Адаз «Гьуьрметдин кьве лишан» (1943, 1945) ва Ленинан (1960) орденар ва медалар ганва. РСФСР-дин халкьдин артистка (1977).

Дурия Рагьимова

1929 — 2014

Къуба райондин Хъимилрин хуьре дидедиз хьана. 1946-йисуз Къубада пед­училище куьтягьна, райондин культурадин кIвалин директорвиле кIвалахна. 1960-1962-йисара Къубадин государстводин А.-Къ. Бакиханован тIварунихъ галай­ драмтеатрдин актриса тир. Музыкадин тамашайра 25-далай виниз кьилин ролар тамамарна.

1957-йисуз – Бакуда жегьилринни студентрин фестивалдин лауреат. Бакуда хьайи международный «Мугъам-69» фестивалдин лауреат.

1963-1989-йисара Лезги театрдин актер. 1989-1998-йисара Дербентда азербайжанрин халкьдин театрдин художественный руководитель ва режиссер. 1998-йисалай Дербентда азербайжанрин государстводин театрдин режиссер.

ДАССР-дин халкьдин артистка (1977), «Халкьарин дуствал» орден ганва (1986).

Тарлан Мамедов

1950

Ахцегь райондин Фиярин хуьре дидедиз хьана. РД-дин халкьдин артист я (2000). Мегьамед Гьуьсейнова къейдзавайвал, адахъ «баритональный тенордин, гуьрчег тембрдин» сес ава. Лезги халкьдин манияр виридалайни хъсандиз тамамарайбурукай сад я.

Роза Максумова

1966

Азербайжандин Сальяны шегьерда дидедиз хьана. 1999-йисуз ДГУ-дин тарихдин факультет куьтягьна. Дагъустандин халкьдин артистка.

Къейд. Мегьамед Гьуьсейнова «халкьдин пландин инструментальщикрикай»­ са шумудан тIвар кьазва.

Уруж Абубакаров

1911 – 1982

Ахцегьа дидедиз хьайи ам сивяй ядай халкьдин алатар (зуьрне, балабан, туьтег, дудук) ядай чIехи устад тир. 1930-йисуз Дагъустандин радиода кIвалахиз эгечIна. 1937-1960-йисара – Дагъустандин манийринни кьуьлерин ансамблдин алатрин группадин солист, концертмейстер. 1960-1972-йисара «Лезгинка» ансамблда алатрин группадин кьиле хьана. Дагъустандин халкьарин, С. Агъабабован, Г. Гьасанован ва маса чи композиторрин гьаваяр тамамарна. РСФСР-дин лайихлу артист (1960), «Гьуьрметдин лишан» орден ганва (1967).

Мегьамед Амирханов

1937

Ахцегь райондин Къутунхърин хуьре дидедиз хьана. Зуьрне, туьтег, балабан ядай машгьур устад я. 1959-йисалай – Дагъустандин манийринни кьуьлерин ансамблдин оркестрдин солист, 1972-1981-йисара – «Лезгинка» ансамблдин оркестрдин солист. Ансамблдихъ галаз Англияда, Голландияда, Бельгияда ва маса уьлквейра­ гаст­ролра хьана.

Къейд. Мегьамед Гьуьсейнова «академический пландин инструментальщикарни» чи культурада пайда хьанвайдакай лугьузва.  

Елена Гьасанова

1938

Готфрид Гьасанован руш Ленинградда дидедиз хьана. Махачкъалада музыкадин училищеда ада вичин бубадин гъилик фортепианодин классда кIелна. 1961-йисуз Москвадин консерватория акьалтIарна, гьа чIавалай гьа консерваторияда музыкадин училищеда фортепианодай муаллим яз кIвалахна.

Рена Эфендиева

1938

Махачкъалада дидедиз хьана. Фортепианодай педагог, пианистка я. 1957-йисуз Махачкъаладин музыкадин училищеда фортепианодин отделение, 1962-йисуз Москвада Гнесинрин музыкадинни педагогикадин институт, Саратовдин консерваториядин аспиранту­ра акьалтIарна. 1964-1972-йисара – Дагъустандин филармониядин солистка, лектор-ис­кусствовед, художественный руководитель. Гуьгъуьнлай Махачкъалада, Благовещенск­да, Москвада музыкадин училищейра ва школайра тарсар гана.

Москвада (1960) ва Ленинградда (1969) Дагъустандин литературадин ва искусстводин йикъара иштиракна. ДАССР-дин халкьдин артистка. Махачкъалада, Тифлисда, Бакуда, Москвада, Ленинградда ва маса шегьерра сольный концертар гана. Адан репертуарда Ф. Листан, Ф. Шопенан, А. Скрябинан эсерар авай. Дагъустанви композиторрин са кьадар эсерар сифте яз ада тамамарна.

А. Омаров