Са шумуд югъ идалай вилик Венгриядин меркез Будапешт шегьерда кьуршахар кьунин 3 жуьредай (азаддаказ, грекринни римлуйрин жуьреда ва дишегьлинрин арада) кьиле фейи турнирда дуьньядин жуьреба-жуьре уьлквейрай тир 600 спортсменди иштиракна. Абурун арадай яз, алай вахтунда Грециядин патай экъечIзавай чи машгьур спортсмен Даурен Куругълиева (86 кг-дал къведалди) гимишдин медаль къазанмишна.
Къейд авун лазим я хьи, сентябрдиз Сербиядин меркез Белград шегьерда кьуршахар кьунай кьиле фидай дуьньядин чемпионатдалди кьве варз амаз тешкилнавай эхиримжи турнирдин — грекринни римлуйрин жуьреда кьуршахар кьунай Олимпиададин чемпион (1964-йис), Олимпиададин 3 сеферда призер ва дуьньядин чемпион Имре Пойякан ва Олимпидадин (1968-йис), дуьньядин кьве сеферда чемпион Янош Варгадин экуь къаматриз бахшна кьиле тухузвай мемориалдин — кьилин макьсад уьлквейрин хкянавай командайрин «кандидатрин» гьал ахтармишун тир.
Д.Куругълиева турнирдин финалдиз акъатдалди 3 бягьс агалкьунралди акьалтIарна. Финалдин эвел кьиляй кIвачин метIиз тIарвал хьайи ам Сан-Маринодай тир Олимпиададин ва Европадин къугъунрин буьруьнждин призёр Майлз Аминаз, са очкодин тафават аваз, кумукьна.
РикIел хкин: алай йисан апрелдиз Хорватиядин Загреб шегьерда азаддаказ кьуршахар кьунай Европадин чемпионатда Д.Куругълиева кьвед лагьай сеферда Европадин чемпионвилин тIвар къазанмишна.
Къастунал мягькем, руьгьдиз викIегь спортсмендик чна еке умудар кутунва.
Рагнеда Рамалданова
