24-майдиз Москвада “Октябрь” киноцентрада тарихдин “Аманат” драма къалурна, — хабар гузва РД-дин Кьилин пресс-къуллугъди. Адан официальный пай Россиядин халкьарин КIвалин директор Анна Полежаевади ачухна. Атанвай мугьманрин арада Россиядин Федерациядин Президентдин Администрациядин Руководителдин заместитель Мегьамедсалам Мегьамедов, Дагъустан Республикадин Кьил Сергей Меликов, миллетрин крарай Федеральный агентстводин руководитель Игорь Барынов, Россиядин кинодин ва шоу-бизнесдин гъетер, Дагъустандин ва Россиядин машгьур общественный деятелар авай.
“Аманат” фильмдин бинеда Имам Шамилан хва Жамалудинанни дворянка Лиза Оленинадин гьакъикъи кIанивилин тарих ава. Фильмда Россиядин кьушунрихъ галаз Имам Шамила кьиле тухвай Кавказдин дяведин вахт къалурзава. Жамалудин 1839-йисуз бубади Россиядиз аманатдин ерида аваз, яни залуквиле вуганай.
“Аманатдин” кьилин продюсер Шамиль Жафарова, мугьманар тебрикуналди, региондин Кьил Сергей Меликоваз Дагъустанда съемкаяр тешкилиз куьмек гунай чухсагъул лагьана. РикIел хкин хьи, фильмда Россиядин кинодин гъетерихъ галаз санал Гуниб райондин агьалийрини иштиракна.
Мегьамедсалам Мегьамедова фильм къалурдалди вилик проектдин метлеблувилиз вичин къимет гана: “Заз и фильмдин рабочий вариантдиз килигдай мумкинвал хьана. Лугьуз жеда хьи, заз ам бегенмиш хьана — фильм лап хъсанди я. Гьакъикъатдани, къейд ийиз жедай кар я хьи, кинокартинадиз Россиядин халкьарин культурадин ирсинин йис яз малумарнавай йисуз экуь дуьнья акуна. Гзаф миллетрикай, гзаф динрикай ибарат тир чи чIехи уьлкве патал идахъ еке метлеб ава. Зун агъазва хьи, Кавказдин дяведин девирдиз килигуналди, чаз халкьарин арада сада-садал ихтибар авун четин кIвалах тирдан гъавурда гьатдай мумкинвал гузва. Чи гуьрчег чилел гзаф жуьрейрин надир культура ва гьа са вахтунда Россиядин халкьарин умумивал арадал атана. Гьикьван къе чи душманри и кIвалахар ред ийиз алахъзаватIани, абур патал са шейни арадал къведач. Чи халкь анжах къуватлу ва сад-садаз мукьва жеда. Зун агъазва хьи, “Аманат” проектдихъ агалкьунар жеда ва адаз жезмай кьван гзаф инсанар килигда. Вучиз лагьайтIа, ана гуьрчег кIанивилин тарихдай инсанар, халкьар санлай чеб чпив гьикI агатзаватIа къалурзава. Зун инанмиш я хьи, и фильмдиз килигайла, Дагъустандикай мадни гзаф чириз кIан жеда. Садаз-садакай чаз гьикьван гзаф чир хьайитIа, гьакьван чи дуствал мягькем ва девлетлу жеда!» — къейдна РФ-дин Президентдин Администрациядин Руководителдин заместителди.
Ада гьакIни лагьана хьи, “Аманат” кинофильмди Россиядин гзаф халкьарин тарих машгьурунихъ элкъуьрнавай са жерге проектар уьмуьрдиз кечирмишуниз ва садвал мягькемаруниз рехъ ачухда.
«Лезги газет»
