Чи чIехи уьлкведин гьар са пипIе гзаф лезгийри намуслувилелди зегьмет чIугвазва. 1970-йисарин сифте кьилера къунши республика тир Къазахстандиз лезги районрин хуьрерай гзаф хизанар нафтIадин мяденра кIвалахиз фенай. Ана абуру гьатта хуьрерни кутуна. Виридалайни гзаф лезгияр фейи чка жегьил шегьер ЦIийи Уьзень я. Чпин дирибашвилелди, карчивилелди абуру шегьер арадал атуник къуьн кутунай. Къазахстандин Президент Нурсултан Назарбаева са сеферда вири миллетрин ассамблеядин са мярекатда икI лагьанай: “Къазахстандин гегьенш чилел вири миллетриз къазахрихъ галаз сад хьтин ихтиярар ава кIвал-югъ кутадай, зегьмет чIугвадай, яшамиш жедай. Чи рикI гегьенш я, чи и кьил, а кьил авачир мублагь чуьллер хьиз”. ЦIийи Уьзень хкажиз вичин пай кутур, ана геждалди яшамиш хьайи Сулейман-Стальский райондин Алидхуьрелай тир Мегьамедов Нефтялидин бажарагълу хва Сийидалидикай я зи къенин суьгьбет…
Сийидали 1972-йисан апрелдин сифте кьилера ЦIийи Уьзенда дидедиз хьана. ГъвечIи чIавалай хирург жедай къаст рикIе авай жаванди гьеле мектебда амаз, хер-кьацI хьайила, вичи-вичиз ва масабурузни духтурди хьиз куьмекардай. Школа хъсан къиметралди акьалтIарна, ам 1989-йисуз вичин хайи халу авай Ижевск шегьердиз акъатна. Ана медицинадин академия агалкьунралди акьалтIарна, 20 йисалай гзаф вахт я гьана бажарагълудаказ кIвалахиз. С.Мегьамедов шегьерда виридалайни екеди тир 3-нумрадин клиникадин заведующийвиле зегьмет чIугвазвай духтур-хирург я. И клиникада терапевтикадин отделенида 12 пешекарди кIвалахзава. Ина чи ватанэгьли илимдални машгъул хьана, ам медицинадин илимрин кандидат я. Шегьерда ам виридаз чида. Духтуррин арада жезвай радио-марафонра, газетрин чинра адани инсанрин суалриз талукь жавабар гуз жеда. И клиникада пациентриз операция авур 3 сятинилай кIвализ хъфидай ихтияр ава, абур духтурдин гуьзчивилик жезва.
С.Мегьамедован гъилик алакьунар, чIехи тежриба авай духтуррини кIвалахзава. Абурун вилик квай везифа начагъдаз, тадидаказ вири патарихъай ахтармишна, операция авуна, ам сагъарна рекье хтун я. Ана Дагъустанда авачир хьтин бязи цIийи рекьер, къайдаяр ишлемишзава, нетижада азарлу инсан фад сагъ хъжезва ва, духтурдиз сагърай лагьана, хъфизва. Ижевскдин агьалияр, са азар-уьзуьр хьайила, гьасятда духтуррин патав фида, чибур хьиз, кваз такьаз ацукьдач.
Алай аямдин медицинадин вири истемишунрал амалзавай Сийидали Мегьамедоваз Удмуртиядин здравоохраненидин министерствода ва гьакI азарханайра кIвалахзавай маса пешекар духтуррин арада еке гьуьрмет, авторитет ава. Адан патав датIана Дагъустандайни, умуд кутуна, меслят къачуз, сагъламвал къайдадик кухтаз инсанар физва. Ада вичин патав атай кас садрани кьулухъ рахкурзавач, куьмекарзава.
Дагъустандин вири векилриз ана ам гзаф сейли я. Духтурдин руьгь чIехиди хьайила, инсандилай уьзуьрарни фад алатда. С.Мегьамедован къаматдай, адан бубадин кIвале суьгьбетдайла, за кьатIанай хьи, начагъ кас, сифте духтур акурла, адан вилериз тамашда, духтурдин вилерай ада вичиз умуд, ишигъ къачуда, рикIиз сабурлувал яда, ихьтин декьикьаяр виридалайни важиблубур я.
Удмуртия пара гуьзел маканрикай я. Лезги духтур Сийидали ана вичин кIвал-хизан кутуна яшамиш жезва. Кайвани ва аяларни адан гелеваз фенва. Азад вахтунда ада шегьердин гуьзел чкайра хизанарни галаз сейрзава. Ам тIебиатдал пара кьару кас я. Гад атайла, Сийидали духтур вичин хизанарни галаз Алидхуьрел ял ягъиз, багърийрал кьил чIугваз хкведа. Бубадин кIвал адаз гьамиша багьа ва истеклу я. Ина абуруз дидеди рикI алай хуьрекар гуз жеда. Буба Нефтялиди хтулрихъ галаз хушдаказ рафтарвалзава. ЧIехибурувай хци гилани тарсар къачузва.
Лезги халкьдихъ бажарагълу духтурар гзаф ава, амма зун таниш хьайи Сийидали Мегьамедов илимдин бязи рекьерай тафаватлу я. Гьа икI, гьина аватIани, чи ватандашри чеб алай чкаяр гуьрчегарзава. Баркалла!
Бикеханум Алибегова
