Аллагьдин эмирдалди
Са сеферда яргъал рекьиз экъечIай имам Агьмад йиф акъудун патал са танишни авачир хуьре амукьдайвал хьана. Ам ина авай мискIиндиз фена, Аллагьдиз ибадат авуна, къаткиз гьазур хьана. Ярх хьана са тIимил вахт арадай фейила, мискIиндиз къаравул гьахьна:
- Яда, вуна вучзавайди я? – хабар кьуна ада.
- Заз ина йиф акъудиз кIанзава, - жаваб хгана имамди.
- Им ахвардай чка туш, - кьетIидаказ лагьана къаравулди.
Адаз мискIинда авайди имам Агьмад тирди чизвачир, я имамдини адаз вич вуж ятIа лагьанач. Эгер ада вич имам Агьмад тирди лагьанайтIа, къаравулди, са шакни алачиз, ам мискIинда тадай.
- ЭкъечI мискIиндай, - алава хъувуна къаравулди.
- Са тIимил кьванни ксудай мумкинвал це, - тIалабна имамди.
- Ваъ, вавай ина ксуз жедач, чаз и кар къадагъа авунва, - гъавурда туна къаравулди.
Чара амукь тавур имам мискIиндай экъечIна, ракIарин патав чилел ярх хьана. Амма къаравулди адав инални секинвал гьиссиз тунач, чукурна.
Дуьшуьшдай и агьвалат таза фар чурун патал тини ишинзавай касдиз акуна. Ада, имамдиз мукьва хьана, лагьана:
- Ша за фу чразвай чкадиз, гьана ял ягъа. Къуй вун зи мугьман хьурай.
Имам адан теклифдал рази хьана ва абур фу чразвай чкадиз фена.
Агьмад са кардин шагьид хьана: тини ишинзавайда, гьар са гьерекат ийидайла, “астафируллагь” лугьузвай. Имамди адавай хабар кьуна:
- Вуна фадлай зикир ийизвани?
- Эхь, - жаваб гана тини ишинзавайда.
- Ваз ви дуьайрин бегьерар акунани?
- Акуна, - лагьана ада.
- Абур гьихьтинбур я? - хабар кьуна имамди.
- Аллагьди зи дуьаяр кьабулзава, тек са затI квачиз, амай вири гузва заз зи Халикьди.
- Кьилиз акъат тийизвай ви тIалабун гьихьтинди я?
- За Аллагьдивай заз имам Агьмад ибн Ханбал къалурун тIалабзава.
Имамди лагьана: “Аллагьу акбар! Аллагьди ви тIалабун кьилиз акъудна. Зун Агьмад ибн Ханбал я. Жувазни хабар авачир зун Аллагьдин эмирдалди иниз акъатна”.
Гьазурайди - Агьмед Магьмудов