КьетIен тIебиат авай, мугьманперес, Ватандиз вафалу, бажарагълу инсанралди машгьур Хъукьварин хуьр. И машгьурвал адахъ белки жедачир, эгер хуьруьхъ, ата-бубайрилай башламишна адалатлу мягькем диб авачиртIа, несилриз дуьз тербия ганачиртIа, зегьмет къачуз, сада-сад эхи ийиз, миллетрин арада гьуьрмет-хатур хуьз чирначиртIа. Гьавиляй гзаф хъукьвавияр маса миллетрин векилрихъ галаз хизанар кутуна ислягьдаказ яшамиш жезва.

2006-йисуз тухвай переписдин нетижайрай аквазвайвал, Хъукьварин хуьре 212 кIвал ава, 800 кас  яшамиш жезва, гьа жигьетдай яз, школадиз фидай яш хьанвай — 210 аял. Хуьре юкьван мектеб­, Культурадин кIвал, библиотека, ФАП, ала­къадин отделение, МУП, са шумуд туьквен ава. Дербентдиз физ-хкведай  маршрут кардик ква. Хуьруьн админист­рация халкьдин къуллугъда акъвазнава­. Хивдай хуьруьз кьван ва хуьруьн куь­чейрани къир цанва. Хъукьварин школа акьалтIарай 20 касдикай  илимдин докторарни кандидатар хьанва. Илимдал машгъул жезвай жегьилрин кьадарни тIимил туш. 25-далай виниз хъукьвавияр — РД-дин лайихлу муаллимар, гьуьр­метдин тIвараринни гьукуматдин шабагьрин, орденринни медалрин сагьибар я.

Спортдин рекьени хъукьвавийри чеб дуьньядиз машгьурнава: гъилер кьунай дуьньядин чемпионар тир вахни стха Шихметовар, СССР-дин лайихлу тренер  Сидир  Жабраилов  ва масабур. Сидир Жабраилов 1939-йисуз дидедиз хьана. Хъукьварин школа акьалтIарай жегьил Белоруссия ССР-дин гьукуматдин физический культурадинни спортдин институтдиз гьахьна. Лап хъсан чирвилер къачур ва алакьунар авай ам хайи республикадиз хтана. Ада сифте спортдин “Динамо”, гуьгъуьнлайни “Урожай” обществойра кIвалахна. Гзаф йисара азаддаказ кьуршахар кьунай “Динамода” Олимпийский школадин директор хьана. 1982-йисалай ам Гь.Гьамзатован тIварунихъ галай Олимпийский резервда авай шко­ла­да азаддаказ кьуршахар  кьунай тренер-муаллим тир. Международный классдин спортдин мастер С.Жабраилов азаддаказ кьуршахар кьунай СССР-дин,  РФ-дин лайихлу тренер, культурадин лайихлу къуллугъчи, Махачкъала шегьердин гьуьрметлу агьали, азаддаказ кьуршахар кьунай РД-дин советдин председателдин йисан тренер тир.

Адавай вердишвилер къачур Расул Катанавосов 1991-йисуз СССР-дин чемпион, 1993-йисуз дуьньядин чемпион, Музай Ибрагьимов кьве сеферда Европадин чемпион, СССР-дин чемпион, дуьньядин кубокдин сагьиб, 1980-йисуз Мегьамедхан Арацилов Олимпийский къу­гъунрин гимишдин призер, 1978-йисуз дуьньядин чемпион, дуьньядин кубокдин сагьиб, вад сеферда СССР-дин чемпион хьана. С.Жабраиловавай вердишвилер къачур жегьилар мадни ава: Россиядин лайихлу тренер, РД-дин физический культурадин ва спортдин министрдин 1-заместитель Зайнал Салаутдинов, СССР-дин ва РФ-дин лайихлу тренер Межид Мегьамедов, СССР-дин ва РФ-дин лайихлу тренер, РД-дин ва РФ-дин халкьдин тренер Сиражудин Элдаров, РФ-дин лайихлу тренер Эседуллагь Шагьмарданов ва машгьур ма­са спортсменар.

Гьайиф хьи, зурба спортсменрин, хъсан тешкилатчийрин муаллим, меслятчи тир Сидир Жабраилов чи арадай фад акъатна. Ада вичи лугьуз хьайивал, Сидир бахтлу хизандин кьил я — веледар­ вири динжарна, кIвалин-къан сагьибар я, уьмуьрдин юлдаш — Гуьлуьзар РД-дин здравоохраненидин лайихлу работник.

Абуруз муьгьуьббатдин гьалкъада авай ксар лугьудай, сад галачиз садавай югъни кечирмишиз  жедачир… Кайваниди Сидиран гъилерал чан гана, уьмуьрдин юлдаш секинарна пуд варзни тахьанмаз ам вични рагьметдиз фена. Сидир хайи хуьруьн сурара фаракъатнава.

2016-йисуз РД-дин Халкьдин Собранидин нубатдин сессиядал Сидир Жабраилован тIвар эбеди яз амукьун патал адан ученик, депутат  Мегьамедхан Арацилов рахана, ам яшамиш хьайи кIва­лерин цлал мемориальный кьул алкIу­ру­нин теклиф гана.

2017-йисан 25-майдиз Хивда Сидир Жабраилов рикIел хкуниз талукьарнавай азаддаказ кьуршахар кьунай республикадин турнир кьиле тухвана. И турнир тухуник Халкьдин Собранидин депутат Мегьамедхан Арацилован чIехи пайни квайди вири хъукьвавийриз чизва.

Сидир Жабраиловичаз хайи хуьре спортзал эцигдай фикирар авайди тир. Ада ам эцигдай чкани хкянавай, амма…

Сидир ватанперес инсан, уьлкве чкIиз башламишай вахтунда арадал атай “Садвал” гьерекатдин иштиракчини тир. Чи жемятдин тIалабуналди хуьруьн виликан кавха Назир Агьмедов чи хуьруьн амадаг, РД-дин экономикадин ва территорияр вилик тухунин  министр Раюдин Юсуфовахъ галаз гуьруьшмиш хьана, ада спортзал жеда, куьмекар гуда лагьана хиве кьуна.

Спортзал эцигиз 2013-йисуз башламишна, са йисан вахтунда диб кутуни, са тIимил кьван хкажни авуна хкудна. Гила эцигунар акъваз хьанва.

Зайнал Салаутдинова, Халкьдин Собранидин депутат Нариман Асварова чпихъ Махачкъалада Сидир Жабраилован турнир кьиле тухунин, ам яшамиш хьайи кIвалерин цлал мемориальный кьул алкIурунин ва гьакIни адан тIвару­нихъ меркезда са куьче ягъунин  фикир авайдакай лагьанай. Сидир Жабраилов рикIел хкунин турнирар хайи хуьре, Хъукьва гьар йисуз тухудай ниятар авайдини ашкара авунай. Чна абуруз Сидиран хуьре спортзал авачирдакай, башламишнавай эцигунар акъваз хьанвайдакай лагьанай.

Чаз, хуьруьн жемятдиз, чи багъри “Лезги газетни” арада аваз, машгьур  тре­нер­-муаллим, общественный деятель, тешкилатчи С.Жабраилован мурад  кьилиз акъудиз — Хъукьварин хуьре спортзал эцигун давамарунин карда адан сухтайри, агьваллу ксари куьмекар ганайтIа кIанзавай. Им чи хуьруьн жегьилар патал къимет авачир савкьат жедай­.

Сидир Жабраилован тIварцIихъ ягъун­ фикирдик квай и спортзал эцигиз куь­мек гайи са касни хъукьвавийри ри­кIелай алуддач.

Демирбег Эмирбегов, Хъукьварин хуьр