Са тIимил йикъар идалай вилик Астрахань шегьерда 2004-2005 ва 2006-2007-йисара дидедиз хьанвай жаванрин арада боксдай Вирироссиядин турнир кьиле фена. Ана Россиядин регионрин хкянавай 12 командадик кваз 150-дав агакьна спортсменри чпин гъутарин устадвал къалурна. И турнирда Дагъустандай тир командайрини, гьа гьисабдай яз Сулейман-Стальский райондин спортдин, туризмдин ва жегьилрин крарин рекьяй Комитетди рекье тунвай, КIварчагърин хуьряй тир 4 спортсмендини (тренер Альберт Межидован гъилик вердишвилер къачузва) иштиракна.
РикIел хкин: КIварчагърин гъвечIи спортсменрихъ боксдай республикадин ва адалай къеце кьиле тухвай турнирра инлай виликни хъсан нетижаяр хьанай, чна абурукай са шумудра кхьенай.
Нубатдин сеферда турнирда А.Межидован гъилик вердишвилер къачузвай кьве спортсменди: 30 кг-дин заланвал авайбурун арада Артём Агъамегьамедова ва 36 кг-дин заланвал авай спортсменрин арада Азим Меликова 1-чкаяр кьуна. Идалайни гъейри, Азим Меликов хъсан техника къалурунай махсус пишкешдизни лайихлу хьана. Чи мурад жаванрихъ мадни еке агалкьунар хьун я.
Рагнеда Рамалданова
