Чи ватанэгьлияр — гьар сана
Уьлкведин чIехи шегьерра медицинадин рекьяй вини дережадин пешекарвал къалурзавай духтурар чи ватанэгьлийрин арада гзаф ава. Ихьтин лайихлу чешнейрикай сад медицинадин илимрин кандидат, Москвада гематологиядин центрада пешедал рикI алаз кIвалахзавай духтур Жарият Исмаиловна Шихбабаева я.
Жарият Шихбабаева 1984-йисуз Махачкъалада къуллугъчийрин хизанда дидедиз хьана. Адан буба Сулейман-Стальский райондин Вини СтIалрилай я, диде — Ахцегьай. Буба Исмаил Шихбабаевич Шихбабаева виликдай Сулейман-Стальский районда автомобилрин рекьерин управленидин начальникдин къуллугъ тамамарна, алай вахтунда госстандартдин системада зегьмет чIугвазва. Диде Аида Жабраиловнади сифтедай ДГУ-дин юридический факультетда тарсар гана, гуьгъуьнлай Сулейман-Стальский районда, алай вахтунда Каспийск шегьерда судья яз кIвалахзава. Жарият Шихбабаевадин гъвечIи кьве вахани, дидедилай чешне къачуна, юристар яз Каспийскда кIвалахзава.
Ж.Шихбабаева алай девирдин медицинадикай, тадаракрикай пешекарвилелди менфят къачуз алакьзавай, кар чизвай, вичин чирвилер мадни артухарунал датIана алахънавай духтур я. Ада Россиядин, гьакI вири халкьарин конференцийра активнидаказ иштиракзава.
Къе вичикай лайихлу духтур хьанвай Жариятан рикIе гъвечIи чIавуз юрист хьунин мурад авай. “Дидеди пешедин рекьяй вичин юлдашрихъ галаз месэлаяр веревирддайла, зун абурун пешекарвилин алакьунрал, абурухъ авай чирвилерал гьейран жедай”, — лугьузва ада.
Амма дидеди хизанда са духтур хьун герек я лагьана, пешедин рекьяй Жариятан кьисмет гьялна. 9-классда кIелзавай чIавалай ада медицинадиз артух итиж ийиз башламишна. Виликамаз хъсандиз гьазур хьунин нетижади адаз агалкьунарни гъана. ИкI, 2006-йисуз ада “сагъарунин кар” пешедай Дагъустандин медицинадин академия куьтягьна.
Вузда кIелай йисара ада патфизиологиядиз, кардиохирургиядиз, нейрохирургиядиз, гематологиядиз майилвал къалурзавай. Жегьил духтурди и хилерикай эхиримжиди хкяна.
2006-2008-йисара ада Санкт-Петербург шегьерда Россиядин гематологиядин ва трансфузиологиядин НИИ-да ординатурада кIелна. Гуьгъуьнлай Санкт-Петербургда 2008-йисалай 2011-йисалди духтур-гематолог яз кIвалахна.
2017-йисуз Жарият Исмаиловнади илимдин алемдиз кам къачуна: “Значение клинических и молекулярно-генетических факторов в стратификации рисков у больных истинной полицитемией” темадай агалкьунралди медицинадин илимрин кандидатвилин диссертация хвена. Ада медицинадин кар алай месэлайриз талукь илимдин саки 100 макъала жуьреба-жуьре изданийра чапнава.
“Зун жуван пешедал гзаф кьару инсан я. За сагъар хъувур начагъбуру ийизвай алхишар за жуван кIвалахдин агалкьунар яз гьисабзава”, — лугьузва пешекарди.
2017-йисуз С.П.Боткинан тIварунихъ галай ГКБ-дин патав гвай Москва шегьердин гематологиядин центрада кIвалахал акъвазна. Алай вахтунда ада меркездин медидарада гематологиядиз талукь месэлайрай начагъбуруз меслятар къалурзава. Илимдин рекьяй гзафни-гзаф ада миелопролиферативный азарриз итиж ийизва.
Хизанда кьве аялдиз тербия гузва. Жариятан уьмуьрдин юлдаш светотехнический тешкилат арадал гъанвай карчи я.
Адахъ галаз вузда кIелай бязи юлдашри исятдани Жарият чеб патал чешне я лугьузва. Къуй адахъ кIвалахда, медицинадин илимда мадни еке агалкьунар хьурай!
К.Ферзалиев
