Дагъустанда бажарагълу аялар патал региондин центр ачухнава.
Вузра “Альтаирдин” хилерни ачухун пландик ква
Бажарагълу аялар ва жегьилар патал региондин “Альтаир” центр алатай саласадиз Махачкъалада илимдин ГъвечIи академиядин базада ачухна, хабар гузва Дагъустандин образованидин ва илимдин министерстводин пресс-къуллугъди.
“Чна бажарагълу аялар патал “Альтаир” центр ачухзава. Ана республикадин агьалийривай яратмишунрин, илимдин, техникадин рекьяй чпин алакьунар къалуриз жеда. Махачкъалада цIийи дараматар эцигда, чирвилер гудай цIийи тешкилатдин хилер кьилин образование къачудай идарайра ачухдайвал я”, — лагьана, центр ачухдайла, Дагъустандин гьукуматдин вице-премьер Муслим Телякавова.
Россиядин Президент Владимир Путинан тапшуругъдалди “Сириусдин” моделдиз ухшар аваз чирвилер гудай центраяр илимдин, искусстводин ва спортдин, гьакIни техникадин рекьяй яратмишунра ва проектрин кIвалахда еке алакьунар, агалкьунар къалурай бажарагълу аялар вахтунда майдандиз акъудун, абур вилик тухун ва абуруз куьмекар гун патал уьлкведин вири субъектра ачухун лазим я.
“Сириус” центр 2015-йисан июндиз Сочида Олимпиададин объектрин базада Владимир Путина кьил кутуналди ачухнай, ада къаюмвалдай советдиз регьбервал гузва. “Сириусдин” везифа искусствода, спортда, илимда, гьакIни техникадин рекьяй проектрин кIвалахда алакьунар къалурай бажарагълу аялар фадамаз майдандиз акъудуникай, абур мадни вилик тухуникай ва гележегда абуруз куьмекар гуникай ибарат я.
«Лезги газет»
