5-февралдиз Дагъустандин Кьилин везифаяр вахтуналди тамамарзавай Владимир Васильев кьиле Татарстандин Президент Рустам Минниханов авай делегациядихъ галаз гуьруьшмиш хьана.
Гуьруьшдин сергьятра аваз, кьве региондин кьилери алишверишдинни экономикадин, илимдинни техникадин, медениятдин рекьяй Икьрар кутIунна ва ам кьилиз акъуддай План тестикьарна.
Идалай гъейри, РД-дин промышленностдинни алишверишдин министр Юсуп Умавова Татарстандин промышленностдинни алишверишдин министрдин заместитель Алмаз Хусаиновахъ галаз кьве ведомстводи кIвалахдин жигьетдай алакъаяр хуьдай икьрар кутIунна. Гьа ихьтин икьрардал РД-дин хуьруьн майишатдин ва суьрсетдин министр Керимхан Абасовани Татарстандин хуьруьн майишатдин ва суьрсетдин министрдин заместитель Олег Земскова къулар чIугуна.
Гьа и юкъуз Владимир Васильевни Рустам Минниханов Дагъустан Республикадин МФЦ-диз, са жерге карханайриз, Дербент шегьердиз мугьман хьана.
Республикадин МФЦ-дин директор Осман Хасбулатова мугьманриз центрадин кIвалахдикай суьгьбетна. Адан гафарай малум хьайивал, алай вахтунда Дагъустанда МФЦ-дин 57 филиал ва саки 435 офис ава. Абурун куьмекдалди дагъустанвийри государстводин къуллугърикай менфят къачузва.
Дербентда Владимир Васильев ва Рустам Минниханов сифте Нарын-къеледал хкаж хьана. Ина мугьманриз сиягьат тешкилнавай. Татарстандин делегация тарихдин имаратдихъ галаз мукьувай таниш хьана. Гуьгъуьнлай мугьманар жуьмя мискIиндиз, “Къирхляр” сурариз, “Дербентдин коньякрин завод” ОАО-диз, чехирар хкуддай заводдиз фена.
Дербентда абур РД-дин Кьиблепата Дагъустандин Кьилин везифаяр вахтуналди тамамарзавайдан векил Энрик Муслимова ва шегьердин мэр Малик Баглиева къаршиламишна.
РД-дин Кьилин ва Гьукуматдин Администрациядин пресс-къуллугъ
