Пак Рамазандин вацран эхиримжи юкъуз — 24-июндиз Сулейман-Стальский райондин Сардархуьре диндин межлис кьиле фена. Мярекатда райондин хуьрерин имамри, чкадин агьалийри иштиракна.
Межлис кьиле тухвай Гьасан-гьажи Амаханова виридаз сивер хуьнин сувар мубарак авуналди, гаф Сийидрин хуьруьн имам Ислам Гьамидоваз гана. Ада Къуръандин аятар кIелна.
Гуьгъуьнлай межлисдал рахай Алкьвадрин хуьруьн администрациядин кьил Нурали Эмрагьова хуьре ихьтин мярекатар гьар йисуз тешкилунихъ еке метлеб авайди къейдна.
Межлисдин сергьятра аваз Ислам диндикай, пак Рамазандин вацран лайихлувилерикай Ичинрин хуьруьн имам Ариф Рустамова, Экенрин хуьруьн имам Эрзиман Расулова, Зизикрин хуьруьн имам Мугьаммаднаби Сафаралиева, Сардархуьруьн имам Абдулла Садикьова гегьенш суьгьбетар авуна.
Къейд ийин, эхиримжи вахтара Кьиблепатан Дагъустандин хуьрера мукьвал-мукьвал диндин межлисар кьиле тухузва. И делилди лезги халкь чи чIехи бубайрин — Мугьаммад Ярагъидин, Алкьвадар Гьасан-эфендидин, Гьажи Давудан рекьиз мукьва хъжезвайдан гьакъиндай шагьидвалзава.
