Дагъустанвийри улакьра аваз финай рекьин гьакъи телефонрин куьмекдалди гун 1,5 сеферда артух хьанва. РикIел хкин, са варз идалай вилик кардик кутунвай акциядин бинедаллаз, республикада жемиятдин улакьра аваз (автобусар, троллейбусар…) физвай касди рекьин пул смартфондай гуз хьайитIа, адан къимет 8 манатдин ужуз жезва. Анжах телефонда авайди “Мир” карта хьун лазим я. Ихьтин серенжемдикай бесконтактный къайдада карта кьабулдай терминалар алай троллейбусра ва автобусра менфят къачуз жеда.

Серенжем башламиш хьайидалай инихъ са вацран муддатда икI гьакъи гузвайбурун кьадар 1,5 сеферда артух хьанва. Серенжем кардик акатна кьвед лагьай варз я, ам алай йисан 30-июндалди давам жеда.

Къейд ийин хьи, и серенжемдикай менфят къачун патал “Мир” системадин карта смартфонда “Mir Pay” ва я тахьай­тIа гьакъи гудай “Samsung Pay” сервисдин куьмекдалди тваз жеда. Чир хьухь: телефон NFC функция (функция бесконтактной оплаты) кьилиз акъудиз жедайди хьун чарасуз я. Гьа са вахтунда карта вич гьи банкуна ва гьи регионда акъуд­навайди ятIа, гьадалай аслу тушиз­, и се­ренжемдикай гьам Дагъустандин агьа­лий­ривай, гьамни республикадин мугьманривай менфят къачуз жеда. Серенжемда гьакIни банкунин онлайн-приложенида кардик ­кутунвай виртуальный картайривайни иштиракиз жеда. Амма пластикадин картайривай и серенжемдикай менфят къачуз жедач.

Гьазурайди — Муса Агьмедов