Алай йисан 17-октябрдиз алим, физикадинни математикадин илимрин кандидат Александр Абдулгьахъович Аливердиеван 85 йис тамам хьана. А. Аливердиев 1940-йисуз Москвада дидедиз хьана. Адан буба, ери-бине Ахцегьай тир ва гележегда ветеринариядин илимрин доктор, профессор хьайи Абдулгьахъ Абутрабович Аливердиева (1910-1992) а чIавуз Москвадин ветеринариядин институтдин аспирантурада кIелзавай.
1941-йисан июлдиз, Ватандин ЧIехи дяве башламиш хьайила, Абдулгьахъ Абутрабовичаз армиядин жергейриз эвер гана. Капитандин чинда аваз, ада Москва патал женгера иштиракна. Идалай кьулухъ СССР-дин чилерин месэлайрай наркомди ам тIегъуьнрихъ галаз женг чIугун патал Къазахстандиз рекье туна, 1944-йисуз Москвадин ветинститутдиз хтана. Кандидатвилин диссертация хвейидалай кьулухъ А. Аливердиев эпизоотологиядин кафедрадин доцентвиле тайинарна.
И вахтунда адан хизан — уьмуьрдин юлдаш ва кьуд аял — Алма-Атадиз акъуднавай. 1944-йисан июлдиз лагьайтIа, духтур Н.Н. Аливердиева Украинадин здравоохраненидин наркомдин ихтиярдиз, Киевдиз командировкадиз рекье туна. Ина гьукуматдин поликлиникада ада 1944-йисан сентябрдилай 1945-йисан февралдалди кIвалахна. Ахпа ам Гагра шегьерда авай ведомстводинди тир «Украина» санаторийдин кьилин духтурвиле тайинарна. 1945-йисан эхирра Абдулгьахъ Абутрабович хайи маканда илим вилик тухун патал Дагъустандиз хтана. Ада гьасятда вичин уьмуьрдин юлдаш ва аяларни хкана. ИкI, Александран аялвилинни жаванвилин вахтунин чIехи пай Махачкъалада акъатна.
Александр Абдулгьахъовича сифтедай Саратовда военный училище лап хъсан къиметралди акьалтIарна. Ахпа, армиядин жергейра къуллугъайдалай кьулухъ — Дагъустандин госуниверситетдин физикадин факультет (гьамни лап хъсан къиметралди) ва аспирантура. 1965-йисуз гвардиядин старший лейтенант Александр Аливердиеваз Ватандин ЧIехи дяведа гъалиб хьайидалай кьулухъ 20 йис алатуниз талукьарнавай медаль гана.
1984-йисуз Александр Абдулгьахъовича физикадинни математикадин илимрин кандидатвилин дережа къачун патал диссертация хвена. Илимдин чIехи къуллугъчи яз кIвалахна. Илимдин 70 кьван кIвалахар чапна. Илимдин асул кIвалахар физикадин, гьа гьисабдай яз квантовый электроникадин, плазмадин физикадин хилериз талукьбур я. 1992-йисалай башламишна, пенсиядиз фидалди ада РФ-дин юстициядин министерстводин патав гвай Дагъустандин суддин экспертизадин лабораторияда кIвалахна. Ина кIвалахиз, ада криминалистикадин техникадихъ галаз алакъалу илимдин кIвалахарни чапна.
2022-йисуз зегьметдин ветеран Александр Абдулгьахъович ва Ирина Константиновна Аливердиеври «брильянтдин мехъер» — санал яшамиш жез 60 йис тамам хьун къейдна. Абурун веледрикай Абутрабани Аниседи хизандин адет давамарна — абурукайни физикадин рекьяй алимар хьана. Хва Абутраба 1998-йисуз — кандидатвилин, 2010-йисуз докторвилин диссертацияр хвена. Алай вахтунда ам РАН-дин ОИВТ-дин ИПГВЭ-дин илимдин кьилин къуллугъчи, ДГУ-дин профессор, кьуд веледдин буба я.
Дустари, амадагри ва мукьва-кьилийри Александр Абдулгьахъовичаз юбилей мубаракзава ва яргъал йисара кIубандаказ уьмуьр кьиле тухун алхишзава.
Чи мухбир
