Мукьвара Ахцегь районда азаддиз кьуршахар кьунай Дагъустанда СССР-дин сад лагьай спортдин мастер Абдулали Гъаниев рикIел хкуниз талукьарна, «Ахцегь район» МР-дин кьил Осман Абдулкеримован призар къачунин турнир кьиле фена.

«Лезги газетдиз» Сулейман-Стальский райондин администрациядин пресс-къуллугъди хабар гузвайвал, акъажунра республикадин 11 райондайни шегьеррай кьуршахар кьунал машгъул пагьливанри (28 килограммдилай 74 килограммдал кьван заланвилин дережайра) иштиракна.

Сулейман-Стальский райондин Герейханован хуьруьн спортдин мектебда тренер-насигьатчи Ибрагьим ЦIарухаеван регьбервилик кваз азаддиз кьуршахар кьунал машгъул жаван спортсменрини чпин устадвал къалурна. ИкI, турнирда Назим Кельбалиева (30 килограммдин заланвилин  дережада) 1-чка кьуна, Икрам Гьабибулаева (32 килограммдин заланвилин дережада) – 3 чка.

Абур кубокралди, медалралди, грамотайралди ва пулдин пишкешралди къейдна.

«Лезги газет»