«Суалар ва жавабар» рубрикадай

— Буба, лекьери датIана чи вер­чер, бадбадар тухузва. Абу­ру­ маса къушар, гьайванар нез­вач­ни?

— Лекьер, бубадин, лап ви­кIегь, вагьши къушар я. Абуру чпин тIем акакьдай вири ничхиррал, гьайванрал гъуьрч ийизва. За ваз, чун аялар галаз сиягьатда авайла, акур са кардикай ахъай­да. Гатфар алукьна, тIе­би­ат­дал чан атанвай майдин варз тир. Чун хуьруьн патав гвай Рычал дередиз сиягьатдиз фена. Пагь, гьикьван гуьзел тир и вахт! Чуьл къацу махпур хьиз авай. Ам цуьквери, къушарин макьамри мадни гуьрчегарнавай.

И юкъуз чаз лекьре гъуьрч ийизвай аламатдин легьзени акуна. КIамун и пата авай тепедилай чаз, лап капал алайди хьиз, кIамун атIа пата лекьре, чилел ацукьиз, гъвечIи къванер къачуз, цавуз хкаж жез, патав гвай гъве­чIи валарал гадарзавайди акуна. И кар ада са шумуд­ сеферда тикрарна. Килигай­тIа, валара къуьр аваз хьана. Эхирни къуьр къарагъна, катна. Лекьрез кIанзавай­дини и кар тир. Къуьр къуватлу къармахра гьатна.

И юкъуз аялриз школадин биологиядин муаллим Нажмудина пехъерини чIагъари, чпиз гишин хьайила, мал-къара авай чка чирна, жанавурриз хабар гудайдакай, абурун кьилелай лув гуз, вагьшияр гьаниз тухудайдакай, абуру  малар, лапагар кукI­ва­­райла, амукьзавай якIун кIу­сар амалдар пехъерини чIагъа­ри тухдалди недайдакай ва ихьтин маса крарикайни ахъайнай.

Аку, чан алаз халкьнавай гьар садаз яшамиш хьун патал чпиз кьван акьулни ганва, амални.

Рамазан Велибегов