(Эвел — 9-14-нумрайра)

Абу Жагьл ибн Хишама рикI тIар жедай жуьреда Пайгъамбардивай (къуй Аллагьдин патай салават ва саламар хьурай вичиз) жузуна: “Эй Мугьаммад, ваз мад акьулдиз текъвер хьтин, чIалахъ тежер хьтин вакъиайрикай чаз суьгьбетар ийиз кIанзавани?” — “Эхь”, — жаваб гана Пайгъамбарди (къуй Аллагьдин патай салават ва саламар хьурай вичиз) ва вичи авур сиягьатдикай Абу Жагьлаз ва анал кIватI хьанвай кьван адан терефдарриз суьгьбет ийиз башламишна. Абур вири мягьтел хьана амукьна.

Абуру лугьузвай: “Са йифен къене Иерусалимдиз фена, элкъвена Меккадиз хтун мумкин кар туш”. Абу Жагьл Пайгъам­бардин (къуй Аллагьдин патай салават ва саламар хьурай вичиз) гафарин чIалахъ жезвачир.

Ада лугьузвай: “Меккадинни Иерусалимдин арада авай мензил лап екеди я, эгер са патан мензилдиз девеяр гьалайтIа, тамам са варз лазим жезва, амма Мугьам­мада (къуй Аллагьдин патай салават ва саламар хьурай вичиз) и яргъал рекьиз вич финни авурла, элкъвена хквенни ийиз­вайди тестикьарзава”.

Пайгъамбарди (къуй Аллагьдин патай салават ва саламар хьурай вичиз)  абуруз­ вири Аллагьдин эмирдалди, ихтиярдалди­ жезвай крар я лагьана жаваб гана. Мек­кадиз хквез рекье авайла, вичел ше­гьер­диз физ­вай карван гьалтайди лагьана ва ада­кай­ тамамдиз ахъайна. Ада гьа чIа­вуз лагьанай: “Карван Меккадиз арбе йи­къан экуь­­нахъ рагъ экъечIдай вахтунда агакь­да”­.

Гьакъикъатда, карван гьа лагьай вахтунда агакьнай. Пайгъамбарди (къуй Аллагьдин патай салават ва саламар хьурай вичиз) йифен сиягьатдикай ихтилат ийидайла, ада кьетIендиз къейд авуна, лугьузвай: “А сиягьат лугьуз тежер жуьре­да, саки легьзеда кьиле фена”.

Са бязи мушрикри РасулалЛагьдин аламатрикай Абу-Бакр асгьабдиз (Аллагь рази хьурай вичелай) хабар гун патал тади къачуз хьана, гьикI хьи, ам шаклу хьана диндилай, имандилай алатда лагьана.

Анжах вафалу тир дустуни икI лагьана: “Эгер и гафар Пайгъамбардинбур (къуй Аллагьдин патай салават ва саламар хьурай вичиз) ятIа, квез ада гьакI ахъайна­ватIа, абур дуьз ва гьахълубур я. Зун, са кIус­­ни шаклу тахьана, гьазур я адахъ агъаз­, за ихтибарзава адан гьар са гафунихъ, гьатта абур чIалахъ  тежедайбур хьайи­тIани”.

Гьавиляй Абу-Бакр асгьаб (Аллагь рази хьурай вичелай) “ас-Сиддикъ” лагьай тIвар­цIиз лайихлуни тир, вучиз лагьайтIа, ада Пайгъамбар (къуй Аллагьдин патай салават ва саламар хьурай вичиз) гьахълу, дуьз тирди субутна, вич чIуру патахъ фи­кирар желб ийиз алахънавай динсузривай са жизви кьванни алакьариз, чIалал гъиз ва чпиз муьтIуьгъариз хьаначир.

Эгер Пайгъамбардин (къуй Аллагьдин патай салават ва саламар хьурай вичиз) ихтилатар душманри инкар ийиз, шаклубур ва бинесузбур яз гьисабнатIа, абуруз аксина мусурманри гьасятда ихтибарвал гъана, куьмек ва даях яз, адан тереф хуьз эгечIна.

Гьакъикъатда, динэгьлийрин рикIера шаклувилер, инанмиш туширвилер хьун виже къведач, амма Пайгъамбардин (къуй Аллагьдин патай салават ва саламар хьурай вичиз) гьакъикъатдихъ, сабурлувилихъ, гьич са шакни рикIе тун тавуна, гьар са мусурман бендеди инанмишвал авун лазим я.

Исраъ валь-Миърадж арадал къведалди, Пайгъамбарди (къуй Аллагьдин патай салават ва саламар хьурай вичиз), Ибрагьим пайгъамбарди (Аллагь рази хьурай вичелай) хьиз, экуьнахъ ва нянихъ кьве кьил капI тир ийизвайди. Идалай гуьгъуьниз, Жабраила (Аллагь рази хьурай вичелай) Пайгъамбардиз (къуй Аллагьдин патай салават ва саламар хьурай вичиз) кпIарин вахтар ва къайдаяр чирна ва алай вахтундани гьа жуьреда давам жезва.

Абдулзагьир  Атаханов