И мукьвара Махачкъалада 2004-2005 — йисара хьайи рушарин арада волейболдай Дагъустандин кIвенкIвечивал патал акъажунар кьиле фена. Ана Ахцегь райондай 2-ДЮСШ-дин тербиячийри (тренер — Нурамет МутIалибов) иштиракна.
Чпин дестеда асантдиз 2-чка кьур абур ярумчух финалдиз акъатна ва анани Каспийск шегьердин командадин винел инанмишвилелди гъалибвал къазанмишна. Финалдин къизгъин акъажунра ахцегьви рушар Махачкъаладин тежрибалу коман-дадихъ галаз бягьсиниз акъатна. Нетижада меркездин рушарин команда РД-дин кIвенкIвечивилин — чемпионвилин дережадиз лайихлу хьана. ИкI, республикадин гужлу 12 командадин арада Ахцегьрин командади 2-чка кьуна. Имни 2008-йисалай инихъ чи волейболисткайрихъ тахьай хьтин еке агалкьун я. Мубаракрай! Къейдин, РД-дин кIвен-кIвечивилин акъажунра Кьиблепатан Дагъустандай анжах са Ахцегьрин командади иштиракна.
Командадик ква: Мамедова Рузана (капитан), Гьажиева Хадиджа, Зугьрабова Эльмира, Омарова Мадина, Магьмудова Карина, Ризаханова Элиза, Юсуфова Эльвира, Алиева Гуьльназ.
Ахцегь райондин руководстводи, гьакI вири районэгьлийрини чи викIегь рушариз ва абурун тренер Нурамет МутIалибоваз чIехи агалкьун рикIин сидкьидай мубаракзава. Къуй квехъ мадни чIехи агалкьунар хьурай, гьуьрметлубур!
Дашдемир Шерифалиев
