(Эвел — 2020-йисан 44-52, 2021-йисан 1-9, 11-14-нумрайра)

3. Маса хутIба ийидайла, Али халифади (Аллагь рази хьурай вичелай) лагьана: “Гьямд хьуй Аллагьдиз, Вичи гьямд куьлег яз авунвай Адан Зикридиз (Ам рикIел гъуниз), себеб яз авунвай Адан регьимар (чаз) артухаруниз ва делил яз авунвай Адан няметриз ва чIехивилиз.

Эй Аллагьдин бендеяр! Дугъриданни, дуьньядал аламайбур патал вахт физва (исятда), (дуьньядай) акъатнавайбурун вахт фейивал. Алатна фейиди гьич хкведач ва заманада авай шейни даим амукьдач. Ни вич вичелай гъейри масадал машгъул авуртIа, ам зулуматра рехъ квахьна (шаклуз) жеда, вич телефдай крара жеда ва адаз вичин пис амал хъсанди яз къалурда (аквада). Дугъриданни, Женнет хъсан (диндар) крара акъажунар ийизвайбурун макьсад я ва ЦIай къайгъусузвал ийизвайбурун макьсад я.

Чир хьухь квез, эй, Аллагьдин бендеяр, дугъриданни, (Аллагьдихъай) авай кичIевал мягькем (гужлу) къеле я, асивал (гунагьар) — усал (зайиф) къеле я, хуьнин карда куьмек тежедай… Эй Аллагьдин бендеяр! За куь рикIел Аллагь гъизва, за куь рикIел Аллагь гъизва, квез виридалай кIани ва багьа ксарин гьакъиндай. Дугъриданни, Аллагьди квез гьахъдин рехъ ачухарна къалурнава ва а рехъ ишигълу (нурлу) авунва.  (Гьавиляй)  я гьамишалугъ бахтсузвал жеда, я даим бахтлувал!

Куьне фана дуьньядин йикъара даим Эхиратдин йикъар патал суьрсетар гьа­зура!­­ Дугъриданни, куьн акъваз хьанвай ва вичиз­ ре­­кье гьатдай эмир мус гудатIа чин тийизвай карван хьиз я. Вич Эхират патал халкьнавай бендеди дуьньядикай вуч ийи­да?­­ Мал-девлетдикайни вуч ийида — мукьвара ви­чивай къахкъуддай ва адан пата­хъай эсер (жавабдарвал), гьахъ-гьисаб амукьдай?!

Эй, Аллагьдин бендеяр! Мукъаятвал ая (куьне) куь амалар (крар) (дикъет­дал­ди) ахтармишдай, гзаф залзалаяр жедай, куьрпе аялар рехи жедай Йикъан гьа­къиндай! Чир хьухь квез, эй Аллагьдин бен­деяр, квел гуьзетчияр ала. Куь чанар ва гуьзетчияр куь бедендин паяр (гъил, кIвач…) я. Куь крар ва куьне (къачузвай) нефесрин кьадар (кхьена) хуьзвайбур керчек “хуьдайбур” (малаикар) я. Куьн абу­рукай я ­йифен зулуматри, я агалнавай зурба варари кIевдач (чуьнуьхдач). Квекай гьар сад “теквилин кIвализ” мукьвал хьанва, “саддиз же­дай утагъдиз”, “кьилди жедай гъурбатдиз” (суруз физ). Куьн гьахъ-гьисабдиз (Къия­матдин Йи­къан­ дувандиз) мукьвал я. (Гьавиляй) куьне масабурулай ибрет къачу ва квел агакьарзавай игьтиятвал авунин хабаррикайни менфят къачу!”.

(КьатI ама)

Ямин  Мегьамедов,

диндин рекьяй алим