(Эвел — 9-11-нумрайра)
Гьа икI зун Мусади (Аллагь рази хьурай вичелай) Аллагьдин патав рахкуриз, хквез хьана, дуьз Сад тир Аллагьди икI лугьудалди: “Гьакъикъатда, йикъа вад капI ийизвай касдин гьар са ибадат за 10 сеферда хкажда ва пишкеш гуда. Эгер инсандин хиялдиз хъсанвал авунин фикир атана, ам тавуртIани, За адаз са хъсанвал авур хьтин суваб кхьизва. Эгер хиялда авай хъсанвал кьилиз акъудайтIа, За адаз 10 хъсанвал авур кьван суваб кхьизва. Эгер са касдин фикирдиз чIуру кар авун атана, ам кьилиз акъуд тавуртIа, За адаз са затIни кхьидач. Эгер ада авур чIуру фикир кьилиз акъудайтIа, За адаз са гунагь кхьизва”.
Ахпа зун Мусадин (Аллагь рази хьурай вичелай) патав эвичIна ва хьайи агьвалатдикай адаз суьгьбетна. “Ахлад Аллагьдин патав ва кьезилвилер, регьятвилер тIалаба!” — цIийи кьилелай лагьана ада. “Зун мад та жуваз регъуь жедалди, Адан патав физ хтана”, — жаваб хганай Пайгъамбарди (къуй Аллагьдин патай салават ва саламар хьурай вичиз).
Аль-Исраъ валь-Миърадж — им Му-гьаммад пайгъамбардиз (къуй Аллагьдин патай салават ва саламар хьурай вичиз) Аллагьдин патай еке тир нямет ва ганвай кьетIен гьуьрмет я.
Миъраджда Пайгъамбардиз (къуй Аллагьдин патай салават ва саламар хьурай вичиз) Аллагьди гзаф кьадар аламатар, инсанривай гьич фикирдизни гъиз тежедай хьтин ва хиялдиз къвен тийидай крар, инсанрихъ агакьарна кIанзавай келимаяр ва инсанриз чпи ийизвай амалриз килигна гузвай къимет ачухна.
Цаварал сиягьат ийизвай вахтунда, Пайгъамбардиз (къуй Аллагьдин патай салават ва саламар хьурай вичиз) ана акур аламатрилай гъейри, мад Аллагь-Таалади адаз цава авай Кааба, яни Байт-уль-Маъмур ва гьакIни Женнет, Жегьеннем, Арш, Курсий, асул рехъ ва масабур къалурна.
Ибурулайни гъейри, Пайгъамбардиз (къуй Аллагьдин патай салават ва саламар хьурай вичиз), сафарда авайла, аламатдин маса крарни акуна. Адаз инсанар акуна гьар юкъуз цан цазвай ва гьар юкъуз бегьер кIватI хъийизвай. Гьар сеферда бегьер кIватI хъувуна куьтягь хьайила, абур чпин сифтегьан чкадал кIватI хъжезвай, яни абуру бегьер сад-садан гуьгъуьналлаз кIватI хъийизвай.
Пайгъамбарди (къуй Аллагьдин патай салават ва саламар хьурай вичиз) Жабраилавай (Аллагь рази хьурай вичелай) хабар кьуна: “Ибур вучтин инсанар я?”. Жабраила (Аллагь рази хьурай вичелай) жаваб гана: “Абур Аллагьдин рекье женг чIугурбур я”. АкI ятIа, Аллагьди абуруз хъсанвилер 700 сеферда артухарзава ва чпи авур харжар Аллагьди чпиз ирс яз хуьда.
Египетдиз агакьайла, Пайгъамбардиз (къуй Аллагьдин патай салават ва саламар хьурай вичиз) хъсан, хуш къведай атирдин ни атана. Ада Жабраилавай (Аллагь рази хьурай вичелай) хабар кьуна: “Я Жабраил (Аллагь рази хьурай вичелай), им вучтин ни я?”. Жабраила (Аллагь рази хьурай вичелай) жаваб гана: “Ам, залум Фиръаванан зулумдик акатна, вагьшивилелди телеф хьайи адан лукI тир дишегьли Машитатан ва адан аялрин атирдин ни я”.
(КьатI ама)
Абдулзагьир Атаханов
