Чи уьлкведа халкьдин ма­йи­­шат­ вахтунихъ галаз кьадайвал­ вилик тухун патал важиблу ва яд, фу, гьава хьиз герек крар гъиле­ кьунай. Абуруз талукь гафар ри­кIел­ни алама: электрификация­, ин­­ду­стриализация, механизация, хими­­за­ция, вак­цинация… Къе гьу­ку­мат­дин­ ви­­­лик цIийи везифа акъвазнава – циф­ризация. Дуьньядин вилик фен­вай вири государствойри цIийи и хел гегьеншарзава ва адаз гзаф кьадар пуларни чара ийизва.

2019-йисалай Россиядани­ «Циф­ровая образовательная­ сре­­да» программадин бинедаллаз и хи­ле кIвалахдай, ам вилик тухудай пешекарар гьазуриз эгечIна. Гзаф регионра айти-клубар, айти-школаяр ачухна. Дагъустандални нубат агакьна. Алатай йисуз абур Дербентда, Избербашда, Къизлярда, Каспийскда ачухна. Ингье и йикъара — меркездани.

9-сентябрь. Махачкъаладин­ пе­­­­дагогвилинни пешекарвилин­ кол­ледж. Гьаятда дамахдивди­ алукI­­навай аялар, студентар, пе­да­гогар, меркездин школайрин директорар, диде-бубаяр кIватI хьанва. Шад мярекат колледждин директор Майрам Гьамидовади ачухна.

– Гьуьрметлу юлдашар, къе меркезда айти-школадин ра­кIа­рар ачухунал за ва коллективди шадвалзава. Алай йисан мартдиз республикадин образованидин ва илимдин министр Яхья Бучаева  «Квехъ авай мумкинвилер фикирда кьуна, колледжда айти-школа кардик кутаз кIанзава. Чи патай вири куьмек агакьда. 1-сентябрдиз школа гьазур хьун лазим я» лагьанай. Вахт тIимил амай­тIани, чи коллективдилай кар алакьна. За кабинетар, классар туькIуьрай, тадаракламишай виридаз сагърай лугьузва.

— Чи колледжрикай айти-школа ачухнавай куьди сад лагьайди я, — лагьана РД-дин обра­зованидин ва илимдин министр­дин заместитель Гьажимурад Ме­гьамедова. – Къе ихьтин школаяр галачиз чалай виликди физ алакьдач. Абуру чи аялриз ва жаванриз алай аямдин технологияр чириз, абурай кьил акъудиз ва ­гележегдин пеше хкягъиз куьмек гуда.

Айти-школадин регьбер Асланова Маринадихъ галаз классра (абур мебелдалди, компьютеррал­ди, интерактивный доскайралди­, сканерралди, принтерралди, ро­ботралди-манипуляторралди… тадаракламишнава) къекъвезва.

— Чна аялриз IT хилен геле­жегда лап герек къведай пешейрай чирвилер гуда, — лугьуз­ва М.Аслановади. – Абурук­ акатзава: программирование, сис­тем­­ное администрирова­ние, приложенияр, роботар туькIуь­рун, ки­­бергигиена, алгоритмикадин ва логистикадин бинеяр… Санлай къачурла, информациядинни телекоммуникацийрин технологийрин ва рекъемрин хилериз талукь чирвилер ва вердишвилер гуда.

Айти-школадиз 6 йисалай 18 йисав агакьдалди яшарин аялар­­ ва жаванар кьабулзава. Колледж Акушинскийдин куьчеда (154-­нумра) ава.

Абад Азадов