РД-дин Кьил Сергей Меликован тапшуругъдалди и йикъара республикадин экономикадин ва мулкар вилик тухунин министерстводини СтIал Сулейманан райондин кьилевайбуру Цмуррин хуьруьн мектебдин патав интернат эцигунин месэлаяр веревирдна.
Лагьана кIанда, и хуьре мектеб инвесторри эцигна, государстводив вахкана. Гьа икI, 1929-йисуз эцигай куьгьне мектеб цIийи дараматди эвезна. Цмуррин хуьре чи йикъара кардик квай мектебда кIелдай 120 чка ава, тамамдиз герек тир инфраструктурадалди таъминарнава. Ина гьакIни муаллимар патал кьилдин кIвалерни эцигнава. И кар себеб яз, дагъда авай гъвечIи хуьруьн мектебдиз Москвадай ва маса регионрай муаллимар желбдай мумкинвал хьанва.
«Цмуррин мектеб хуьрел чан хкай халис макандиз элкъвена. Эхиримжи йисара чкадин агьалийрин кьадар 200 касдин артух хьанва, ина кIвалахдай цIийи чкаяр арадал гъанва, агропромышленный комплекс вилик тухузва. Республикадин Кьили образование вилик тухунин месэлайриз кьетIен фикир гузва ва и проектдини адан фикир вичел желбна. Сергей Алимовича лугьузвайвал, къенин юкъуз чун тек са мектебар эцигуникай ваъ, аялриз, алай аямдин вири истемишунар фикирда кьуна, чирвилер гудай бинеяр арадал гъуникай рахана кIанзава. Цмуррин хуьре лагьайтIа, вири и крар кьилиз акъуднава», — къейдна РД-дин экономикадин ва мулкар вилик тухунин министр Гьажи Султанова.
Мектебдин патав интернат эцигуни ана кIелзавай аялрин кьадар артух хьуниз рехъ ачухда, гьикI лагьайтIа, иниз кIелиз райондин маса хуьрера авай аялривайни къвез жеда.
«Чна и месэла вири патарихъай ахтармишна ва алай йисан эхирдалди проектдинни сметадин документация гьазурун патал герек къведай пулдин такьатриз талукь теклифар гьазурнава. Объект республикадин инвестицийрин программадин куьмекдалди къведай йисуз эцигиз гатIунда», — алава хъувуна министрди.
Совещанидин сергьятра аваз, СтIал Сулейманан районда кьилиз акъудзавай яшайишдин маса объектриз талукь месэлаярни веревирдна.
Агьмед Магьмудов
