И йикъара Ахцегь райондин кьил Осман Абдулкеримова администрацияда «Ахцагь» футболдин командадин тренер Камил Гьажиев ва къапучи Тимур Агьмадов кьабулна.

Дуствилелди кьиле фейи суьгьбетдин вахтунда абуру турнир кьиле фейи гьалдикай веревирдерна. О.Абдулкеримова къейд авурвал, райондин са жерге агьалийри хьиз, вичини командадин агалкьунриз фикир гузвай, гьар са къугъуниз килигзавай. Ада райондин жегьилар спортдал желбунай, абурухъ галаз и жигьетдай тербиядин кIвалах тухунай, къугъунра агалкьунар къазанмишуникди районэгьлийрин руьгь хкажунай чухсагъул малумарна.

Гьар са командадихъ четин месэлаяр, кIеве гьатунар, кьетIен гьалар жезва, амма «Ахцагьди» вири четинвилдериз дурум гуналди, чпин женг давамарзава. Гуьруьшдин вахтунда Камил Гьажиевани Тимур Агьмадова команда бязи дуьшуьшра четин месэлайрал ацалтзавайдакайни ихтилатна. Райондин кьили чарасуз тир спортдин тадаракар къачун ва материалринни техникадин база мягькемарун хиве кьуна.

Гуьруьшдин эхирдай Осман Абдулкеримова командадиз чIехи агалкьунар хьун алхишна.

 «Лезги газет»