Малум тирвал, октябрдин вацра Дагъустан Республикадин “Леззет” тlвар алай санаторийда, “Куьнуьчийрин Международный форум — 2019” кьиле фена.
Дугъустандин куьнуьчийрин обществоди ва РД-дин карчивилинни инвестицийрин агентстводи тешкилнавай ана 400-дав агакьна мугьманри, Россияда ва СНГ-да куьнуьчивилин гьар жуьре рекьерай машгьур алимри — профессор Владимир Кашковскийди, Белоруссиядин милли илимрин академиядин куьнуьчивилин лабораториядин заведующий, биологиядин илимрин кандидат Дмитрий Рагьматулина, Кубандин госуниверситетдин профессор Лариса Моревади, хуьруьн майишатдин илимрин кандидат, куьнуьчи, куьнуьчивилин алатрин изобретатель Виталий Дегтерева, Дагъустандин куьнуьчивилин обществодин председатель Арсен Абигьасанова, гьакlни Германиядин, Украинадин, Гуржистандин, Азербайжандин ва маса регионрин пешекар куьнуьчийри иштиракна.
Форумдин сергьятра аваз илимдинни практикадин конференция, куьнуьчивилиз лазим тир алатрин, литературадин, махсус парталрин, ветеринариядин дарманрин выставкаяр, “2019-йисан лап хъсан вирт” тlвар алаз конкурс кьиле фена.
Анал Россияда куьнуьчивал вилик тухунин, чlижерин азаррин вилик пад кьунин ва и рекье абур сагъардай цlийи тежрибаяр ишлемишунин, хейлин маса месэлаяр веревирдна.
Шад жедай кар ам я хьи, и мярекатда Дагъустанда машгьур тежрибалу куьнуьчи, бине Ахнигай тир, Белижда яшамиш жезвай Рафик Сефербеговани иштиракна.
Ам аниз вичи гьасилнавай виртни гваз фенвай. “2019-йисан лап хъсан вирт” конкурсда иштиракай адан виртIедиз жюриди “полифлёрный (поли — гзаф я, флёр — цуьк) темный мед” номинациядай сад лагьай чка ва къизилдин медаль гана.
Рафик Сефербегова къейд авурвал, конкурсдиз 110 жуьре вирт гъанвай. Жюриди абурун арадай конкурсда иштиракун патал 35 жуьре хкяна, Россельхознадзордин Москвада авай антибиотикрин кьадар ахтармишдай лабораториядиз ракъурна.
Чна Рафик Сефербеговаз и агалкьун мубаракзава.
Къагьриман Ибрагьимов
