25-июлдиз Каспийск шегьерда авай “Анжи-Арена” майдандал, футболдин “Ахцах” ва “Тлярата” командайрин арада къизгъин къугъунар кьиле финалди, Дагъустандин ЛФЛ-дин сад лагьай дивизиондин турнир акьалтIна.
Ахцегьвийри тляратавийрин варариз викIегьдаказ вад туп яна. Гьеле варариз физ кIам-шам амукьай гзаф дуьшуьшар чна гьисабзавач. ИкI, “Ахцах” команда премьер-лигадиз акъатна.
Чпин нубатда кьве туп ахцегьвийрин варариз ягъай тляратавийрини чеб лап ажузбурукай туширди успатна. Майдан кьве командадайни алакьунар авай футболистрин ихтиярда гьатнавай юкъуз тамашачийри къугъуникай лезет хкудна. Шегьердин зегьемлу гьавадизни килиг тавуна, “Ахцах” командадин гьунарриз килигдайбурун кьадар тIимил тушир.
Алай вахтунда Дагъустандин ЛФЛ-дин турнирдин нетижайрин таблицада “Ахцах” кьвед лагьай чкадал ала. Идалай виликни “Ахцах” командади 18-июлдиз “Ботлих” командадин винел викIегьвилелди 2:0 гьисабдалди гъалибвал къазанмишнай.
Къейд ийин, “Ахцах” командадиз эхиримжи йисара тIвар-ван авай футболист Мегьамед Алишева куьмек гузва. Ахцегьви спортсменри къазанмишнавай нетижайрик тежрибалу тренерар тир Камил Гьажиеванни Гьажимурад Парпачеван пайни ква. Къуй дагъвийрин команда мадни еке дережайрив агакьрай!
Лезги Фетгьуьллагь
