Дагъустандин Гьукуматди медицинадин идараяр кислороддалди таъминардай тадаракар къачун патал резервдин фондунай саки 50 миллион манат пулдин такьатар чара авунва. Талукь тир къарардал РД-дин Гьукуматдин Председатель Абдулпатагь Амирханова къул чIугуна.
Пулдин такьатар Дагъустандин здравоохраненидин министерстводи, игьтияж фикирда кьуна, медицинадин тешкилатрин арада пайда. Къейдзавайвал, медицинадин кислороддин кьитвиликай идалай вилик са шумуд медидаради хабар гайидалай кьулухъ алава куьмекар агакьарун кьетIна.
РД-дин Гьукуматдин пресс-къуллугъди хабар гузвайвал, эхиримжи йикъара коронавирус акатзавайбурун кьадар анжах артух жезва. Гьа са вахтунда гьар юкъуз сагъ хъжезвайбурун кьадар начагъ жезвайбурулай тIимил я. Ида мадни алава серенжемар кьабулунин, куьмекар гунин чарасузвал къалурзава. Республикада ковиддиз акси рапар янавайбурун кьадарни артух хьанва.
«Лезги газет»
