Муаллимдин пеше виридалайни четинбурукай, муракаббурукай сад я. Ада вичиз уьмуьр бахш авур касдивай датIана яратмишунин рекье хьун, аялриз акьалтI тийидай рикIин чимивал, мердвал гун истемишзава. Вири и ерияр Каспийск шегьердин А.Гьажибегован тIварунихъ галай 3-нумрадин школадин физикадин муаллим Фарида Гьажиметовна Расуловадиз хас я. И мукьвара, кIелунин цIийи йис алукьай вацра, ада вичин 50 йисан юбилей къейдна.
Фарида Гьажиметовнадин зегьметдин рехъ тамамдаказ и мектебдихъ галаз алакъалу я – ина ада Дагъустандин госуниверситет акьалтIарайдалай кьулухъ физикадин тарсар гузвай жегьил муаллим яз кIвалахиз башламишна. Къенин юкъуз Ф.Расуловадин педагогвилин тежрибади 27 йис тешкилзава. И девирда ада школадин тарихда гьатай баркаллу крар гзаф авуна.
Вичин тIвар чIехи гьарфунилай кхьиниз лайихлу инсан, лап хъсандиз гъавурда авай ва яратмишунин тегьерда кIвалахзавай пешекар тир Фарида Гьажиметовнадиз вичин тарсунал аялрин итиж желб авунин сирер лап хъсандиз чизва лагьайтIа жеда. Ада гьакIни школада вичихъ галаз санал кIвалахзавай, гьакIни шегьердин методкIватIалрин иштиракчияр тир жегьил муаллимриз-амадагриз кIвалахдин рекьяй меслятар гузва, тежрибадикай лугьузва.
КIвалахда кIевидаказ истемишдай, гьа са вахтунда масадан гъавурда гьатдай, инсанрив рикIивай эгечIдай адаз гьар са аялдихъ галаз рафтарвалдай къайда чида – абуру муаллимдиз екез гьуьрметзава, адал рикI ала.
Образованидин хиле гзаф йисара гьакъисагъвилелди зегьмет чIугунай, акьалтзавай несилдиз чирвилер гунин ва тербияламишунин кардик еке пай кутунай ам «Дагъустан Республикадин образованидин отличник» лагьай лишандалди къейднава. Идалайни гъейри, Фарида Расулова «Россиядин Федерациядин образованидин хилен гьуьрметлу работник» я. Школадин коллективди Фарида Гьажиметовнадиз и агалкьунар мубаракзава ва абурал рикIивай дамахзава. Инанмиш я, зегьметдин рекье ам мадни еке нетижайрив агакьда.
Камила Гьажиева
