Квез и шикилдай аквазвайди CтIал Сулейманан райондин центральный библиотекадин кIелдай залдин заведующийвиле кIвалахзавай Меликова Гъулангерек Бубаевна я. 1981-йисуз ада и библиотекада художниквиле кIвалахиз башламишна. Алай вахтунда кIелдай залда 800 касдиз къуллугъзава. Ктабрин кьадар 4000 я.
Лагьана кIанда хьи, Гъулангерек вичин кIвалахдив жавабдарвилелди эгечIзава. Юбилярриз, лишанлу йикъариз, машгьур инсанриз талукьарнавай жуьреба-жуьре мярекатар-межлисар, конференцияр, элкъвей столар, выставкаяр тешкилзава.
Эхиримжи йисара Гъ.Меликовади «Дишегьлидин алем» тIвар алай клуб арадал гъанва. И клубдин иштиракчийри хизанрихъ, сагъламвилихъ, милли хуьрекрихъ галаз алакъалу жуьреба-жуьре темайрай суьгьбетар ийизва.
Гъулангереказ яргъал йисара намуслувилелди зегьмет чIугунай гзаф шабагьарни ганва. Къуй адахъ генани еке агалкьунар ва яргъал йисара кIвалахдай къуватни чандин сагъвал хьурай!
Назифа Юркъулиева
