9-декабрдиз РД-дин Кьил Сергей Меликова «Единая Россия» партиядин Председатель Дмитрий Медведеван Дагъустанда кардик квай жемиятдин приемныйда са жерге дагъустанвияр кьабулна ва абурун арзайриз килигна.
Республикадин Кьиливай куьмек кIанз атанвайбурун арада Украинада кьиле физвай серенжемдин иштиракчи Шамил Вазировни авай. Ада Избербашда авай вичин кIвализ газ гъун ва вичин аялдиз 3 йис жедалди гьар вацра гузвай пособие тайинарун патал куьмекун тIалабна.
Сергей Меликова «ДАГГАЗ» ОАО-дин векилдиз жезмай кьван фад аскердин кIвал газдалди таъминарунин ва и кар икьван чIавалди вучиз авунвайди туштIа тайинарунин буйругъ гана.
И юкъуз республикадин Кьилиз чпихъ авай дердийрикай мад махачкъалави Шариф Шарифова, Каспийскдин агьали Марьям Рабазановади ва масабуру хабар гана.
Гьар садан месэла гьялун патал Сергей Меликова талукь идарайриз тапшуругъар гана.
«Лезги газет»
