И йикъара Махачкъаладин, Дербентдин ва Хасавюртдин агьалийрив МФЦ-ра (икьван гагьди чеб анжах ЗАГС-дай къачуз жезвайбур тир) аял хунин гьакъиндай сифтегьан шагьадатнамаяр агакьна.

ЦУР-дин (центр управления регионом) ва Дагъустандин Кьил Сергей Меликован куьмекни галаз ЗАГС-ди агакьарзавай къуллугърин кьадар тIимиларуниз ва абур вахтунда агакьаруниз талукь яз кIвалахдин десте арадал гъанай. Аник ЦУР-дин, Дагъустандин юстициядин, рекъемрин министерствойрин ва МФЦ-дин векилар квай. Кьиле тухвай ахтармишунрин нетижада ЗАГС-дин къуллугъ, кьилди къачуртIа, аял хунин гьакъиндай шагьадатнама, МФЦ-да агакьарунин теклиф кьабулна. Идахъ галаз алакъалу яз, РД-дин юстициядин министерстводи ва МФЦ-ди талукь къарардал къул чIугуна.

— Республикадин вири районра кардик квай МФЦ-рикай менфят къачуналди, ЗАГС-дин кIвалах кьезилардай, идахъ галаз сад хьиз, агьалийрив идаради агакьарзавай къуллугъ къулайдаказ, кьилинди, яргъал тевгьена, къачудай мумкинвал хьанва. Гила шагьадатнамаяр гьар са МФЦ-да, республикада, прописка авунвай чкадилай аслу тушиз, къачуз жеда, — къейдна ЦУР-дин регьбер Ислам Мусаева.

И проектди гьихьтин четин месэлаяр арадай акъудиз куьмекда?  Кьилди къачуртIа, меркезвийривай, ЗАГС-дилай гъейри, Махачкъалада  кардик квай 5 МФЦ-дикай санай аял хунин гьакъиндай шагьадатнама къачуз жеда. И кар патал сятералди учирра акъвазунин лазимвал авач, абурув и къуллугъ агакьарун патал 120 касди зегьмет чIугвазва, яни 120 дакIар кардик ква.

«Госкъуллугъар» порталдикай ва mfcrd.ru сайтдикай менфят къачуналди­, виликамаз учир кьадай мумкинвал ава.

МФЦ-ра электронный жуьреда учир кьаз жезва, виликдай лагьайтIа, анжах чарчел кхьиз жезвай.

Документар кьабулдай, вахкудай вахт ва йикъарни артухарнава. Абур гьафтеда 6 юкъуз сятдин пакаман 8-далай нянин сятдин 6-далди къачуз, вахчуз жеда.

Чи  мухбир