И йикъара Сулейман-Стальский райондин кьил Нариман Абдулмуталибова нубатдин сеферда хсуси месэлайрин патахъай агьалияр кьабулунин серенжем кьиле тухвана. Идакай «Лезги газетдиз» райадминистрациядин пресс-къуллугъди хабар гузва.

Агьалийрин месэлаяр асул гьисабдай кIвалахдал тайинарунихъ, яшайишдин хилехъ, ЖКХ-дин шартIар хъсанарунихъ… галаз алакъалубур тир.

Адет яз, райондин кьилин патав гзафни-гзаф чпин пешедин рекьяй кIвалах жагъин тийизвай агьалияр къвезва. И месэладай яз Кьасумхуьрелай М.Яралиева, З.Сейбулаева, Э.Гьажибутаева, Герейханован 2-отделенидай Н.Муслимова, Дербент шегьердай Гь. Гьажиагьмедов атанвай. Дикъетдивди яб акалайдалай кьулухъ, лазим тир мумкинвилерни азад чкаяр пайда хьайила, райондин кьили арзачийриз кIвалахдал тайинарунин карда куьмек гун хиве кьуна.

ЦIийихуьруьн мектебда вожатый яз кIвалахзавай кьасумхуьруьнви Р.Малабаевади педагогикадин кIвалахда хьанвай агалкьунриз килигна вичиз гьевесламишдай шабагь гун тIалабна. И месэла талукь тир мектебдин директордал тапшурмишдайвал хьана. Гележегда талукь тир чар райондин образованидин управленидивни райондин кьилив агакьарунин тапшуругъ гана.

Сардархуьруьн «Аманат» аялрин бахчада тербияламиш жезвай аялрин диде-бубайрин дестеди чпин аялар мектебдин автобусда аваз Алкьвадрин хуьряй Сардархуьруьн бахчадиз тухунин месэла тешкилун тIалабна. Месэла гьялунин карда Нариман Абдулмуталибова куьмек гун хиве кьуна.

Жуьреба-жуьре месэлаяр гвай агьалияр мадни атанвай. Санлай къачурла, нубатдин серенжемда райондин кьили 12 агьалидихъ яб акална. Абуруз алакьдай куьмекар гун хиве кьуна, бязи месэлайрин патахъай талукь ксариз чкадал тапшуругъар гана. Вири арзаяр райондин кьили вичин гуьзчивилик кутунва.

«Лезги газет»