23-майдиз эхиримжи зенг ягъуниз талукьарнавай шадвилин линейкаяр Сулейман-Стальский райондани кьиле фена. Алай йисуз районда 11-классар 300-далай виниз ва 9-классар 615 жегьил-жаванди акьалтIарзава.
Кьасумхуьруьн 1-нумрадин юкьван школада эхиримжи зенг ягъуниз талукьарнавай шадвилин митинг муаллим-тешкилатчи Айишат Кьасумовади ачухна, линейкадал выпускной классрин аялриз теклифна выпускникри пайдах хкажна, Россиядин Гимн яна.
Шадвилин линейка выпускникар-активистар тир Майина Къарибовади ва Давид Юзбегова кьиле тухвана.
Школадин директор Зубаил Мегьамедович Устаева муаллимриз, школьникриз, абурун диде-бубайриз сувар мубаракна, школадихъ цIинин кIелунин йисуз хьайи нетижайрикай суьгьбетна, выпускникриз алхишдин келимаяр лагьана.
— ЦIинин кIелунин йисуз школадин 9-класс 49 аялди ва 11-класс 25 касди акьалтIарзава, — лагьана З. Устаева. Выпускникрихъ элкъвена, лугьуз кIанзава: куь гележег экуьди, бахтлуди хьурай!
Райондин кьил Нариман Абдулмуталибован тIварунихъай муаллимриз ва выпускникриз тебрикдин гафар мергьяматлувилин “Умуд” фондунин председатель Савин Велиева лагьана ва насигьатар гана.
Шадвилин линейкадал райадминистрациядин кьилин заместитель Аким Жаватов, диде-бубайрин патай Лилия Шихрагьимова, выпускной классрин руководителар тир Светлана Хаметова, Наида Устаева, 11-класс акьалтIарзавай Дилбер Магьмудова рахана. 1-классдин аялри выпускникриз бахшнавай шиирар кIелна, 7“в” классдин аялри “Эхиримжи зенг” мани тамамарна.
Выпускникар-активистар тир Ирада Жафаровади, Дилбер Магьмудовади ва Гуля Ягъибеговади 10-классда кIелзавай Мальвина Рамазановадив, Диаля Магьмудовадив ва Рамиз Меликовав кIелунин эстафета (ктаб, шартIунин куьлег) вахкана.
Линейкадал 1-классдин ученица Хадижа Нефтялиевади ва 11-классдин ученик Давуд Алиева эхиримжи зенг яна.
Хазран Кьасумов
