Дагъустан Республикадин Кьил Сергей Меликов ачух эфирда авайла агьалийрин патай гзаф суалар атанвай. Абурун чIехи пайни чи меркездин инсанрилай тир. И кар фикирда кьуна Махачкъаладин собранидин депутатар Хиби Алиева ва Мавр Пакалова «Сад тир Россия» партиядин общественный приемныйда шегьерэгьлияр кьабулна ва абурун тIалабунрихъ яб акална. Абуру шегьердиз ва кьилди чпиз талукь месэлаяр къарагъарна.

ИкI, пенсионер, II группадин набут Камилов Мегьамеда вичел коммунальный къуллугърай гузвай пулунин бурж алайдакай ва ам алудиз куьмек кIанзавайдакай лагьана. Набут инсандин месэла гъиле-гъил аваз гьялна ва ам разивилелди хъфена.

Шегьерэгьли Абдурагьимова Гульяради чеб яшамиш жезвай кьакьан кIвалерин къав лап татугай гьалда авайдакай, ам чарасуз ремонтна кIанзавайдакай лагьана. Идан гьакъиндайни серенжемар кьабулдайвал я.

Шегьердин Перован куьчеда яшамиш жезвай Рамазан Рамазанова гзаф квартирайрин кIвалера яшамиш­ жезвай вири агьалийрин тIварцIихъай гьаятдай физвай­ линийрал канализациядин люкар эцигна ва цин тур­баяр­ михьна кIанзавайдакай малумарна. И кардин гьа­къин­дай талукь идарайрин чIехибурухъ галаз рахана ва агьалийрин дерди туькIуьрун лазим тирди къейдна.

— Агьалияр кьабулун, абурун дердияр чирун, инсанриз герек куьмек гун «Сад тир Россия» партиядин векилрин везифа я, — лагьана Хиби Алиева. — Им гьукумдинни агьалийрин арада авай ихтибарвилин алакъаяр мягькемарзавай лап хъсан серенжем я. Ихьтин гуь­руьш­ри агьалийрик секинсузвал кутазвай, абур кIеве твазвай месэлаяр ачухарзава ва абуруз куьмек гудай мумкинвални арадал гъизва. Гьукум идара ийизвайбуру агьалийрин гьар са суалдиз дуьзгуьн жаваб гун герек я. «Сад тир Росссия» партиядин «Халкьдин программадини» чи вилик гьахьтин везифа эцигнава.

Общественный приемныйда 14 кас кьабулна, бязибур къарагъарнавай месэлайрин гъавурда туна, чкадал гьялиз тахьайбур гуьзчивилик кутуна.

Чи  мухбир