Мукьвара зун “Лезги газет” кхьин патал хуьруьн почтадин идарадиз фена. За ам гьар йисуз кхьизвайди я. За почтадин начальник  Эскеров  Маликаз газет кхьиз атанва лагьайла, ада заз 2022-йис патал газет чаз, Къурушрин вири агьалийриз, чи хуьруьнвиди кхьенва лагьана. За адавай тIвар жузурла вичиз адан тIвар чизвач лагьана, ам Ярославль шегьерда яшамиш жезвай кас тирди хабар гана. Ахпа чаз газетдин чинилай “Лезги газетдин” тираж виниз хьунин патахъай чалишмишвал ийизвай чи къурушвидин тIвар чир хьана­. Васиф  Гьасанов, квез чухсагъул! Куь чан сагърай! Куь жибиндик, суфрадик Аллагьди мадни бе­рекат кутурай!

“Лезги газетдин” 4-ноябрдиз акъатай 44-нумрада чапнавай “Къурушвийриз савкьат” макъаладай якъин жезвайвал, ам КцIар райондин ЧIакIа­рин Паласа­ ­хуьряй я. Газетдин тираж хкаж хьуник пай кутунвай муь­куь кас — Заур Балакишиев — Вурвар хуьряй я. Ла­­гьана кIанда, и кьве хуьрени къурушвияр яшамиш­ жезва. В.Гьасанован ери-бине Къурушдилай тир. Ам чаз малум хьайивал, Хайтакьар­ тухумдай я. Азер­бай­жанда исятда къурушвияр яшамиш жезвай­ са шумуд хуьр ава. Амма Къуруш­ тIвар са хуьрелни алач.

Гьуьрметлу хуьруьнвияр, ша чна яргъара яшамиш жезвай чи ватандашрилай чешне къачун. Бизнесдал машгъул жезвай ксари кхьейтIа, хъсан кар, чи хуьруьн тIварни виниз хкаж жеда. Мумкинвилер авай къурушвияр лагьайтIа, цIудралди ава.

Чи багъри газет республикадин муькуь газет­ри­­лай, тираждал гьалтайла 1-чкадал хьун — им лез­­ги­­­яр­ патал еке дамах ийиз жедай кIва­лах­ я. Чун маса миллетрилай, кьадар­дал гьалтайла, са кьадар тIимил я лу­г­ьузватIани, Заур, Васиф хьтин кьегьал рухвайри чун абурулай вилик жергейра твазва. Ша чна чи ва­цIун гурлувал мадни артухарин.

Заз “Лезги газетдин” куьмекдалди Васифазни Заураз бубайрин ватандиз мугьманвиле атун теклифиз кIанзава. Зун гьазур я куьн кьабулиз. Зи теклиф, гьуьрметлубур, куьне инкар тийидайдахъ умудлу я. Гатуз за куьн гуьзлемишда хайи бубайрин ватан тир кьакьан Къурушдал.

Шихали  Багъиров,

Вини Къуруш