Чи ватанэгьлияр — гьар сана
Зи ихтилат Ленинграддин областда образованидин идарайра агалкьунралди жавабдар къуллугъар кьилиз акъудзавай, илимдин, муаллимвилин рекье бегьерлувилелди зегьмет чIугвазвай чи ватанэгьли Жалал Юлчиевич Мамедовакай я.
Ам 1966-йисан 23-мартдиз Хасавюрт райондин Къурушрин хуьре фялейрин хизанда дидедиз хьана. Адан ата-бубаяр, ЦIийи Къурушдал куьч жедалди, Ахцегь райондин дагълух Игъиррин хуьре яшамиш хьайи Пекуьрар тухумдай я.
Жалал Мамедова 1983-йисуз Къурушрин 1-нумрадин юкьван мектеб вадралди куьтягьна. Ам мектебдин комсомолдин тешкилатдин секретарь тир.
1983-йисуз ам Вологдадин некIедин институтдик экечIна. Вузда са йисуз кIелайдалай кьулухъ жегьилдиз СССР-дин Яракьлу къуватрин жергейриз эверна. ЧIулав гьуьлуьн флотда къуллугъ тамамариз эгечIай аскер гуьгъуьнлай Калининграддин областдин Балтийск шегьердин флотдиз рекье туна. Къуллугъ агалкьунралди, чешнелувилелди кьилиз акъудайвиляй аскердилай адан диде-бубадиз чухсагъулдинни разивилин чарар хтана. Къуллугъ викIегьдаказ кьилиз акъудуникай Къурушрин хуьруьн а чIаван “Зегьметдин пайдах” ва республикадин “Коммунист” газетриз макъалаяр акъатна.
Гуьгъуьнлай ада кIелун давамар хъувуна ва технологвилин пеше къачуна. И рекьяй кIвалахунин ашкъи авай жегьилди зегьметдин рехъ Къизляр шегьердин гъеридин заводда кIвалахунилай башламишна. Са шумуд вацра чешнелувилелди кIвалахайдалай кьулухъ Жалал Мамедовал жавабдар къуллугъ — Кьиблепатан Сухокумскда нисияр гьазурдай пунктунин заведующийвал ихтибарна.
Сир туш, 1990-йисар четинбур тир. Гзафбур хьиз, хъсан ва къулай уьмуьр жагъурунин макьсаддалди, Жалал Мамедовни кIвалах ва яшамиш жезвай чкани дегишаруниз мажбур хьана. ИкI, 1993-йисуз кьисметди ватанэгьли Ленинграддин областдин Кировский райондиз акъудна. 1994-йисалай къенин йикъалди адан кIвалах Санкт-Петербург шегьердин пешекарвилин образованидин къурулушдихъ галаз алакъалу я. Жуьреба-жуьре колледжра, училищейра кIвалахай ам къуллугъдин гурарай виниз хкаж хьана. Муаллимвилелай гъейри, ада 8 йисуз техникумдин директордин заместителвилени кIвалахна. Тежриба ва регьбервилин алакьунар авай пешекар тирвиляй чирвилер гунин идарайра лап муракаб гьалар арадал атанвай макъамра Ленинграддин областдин умуми ва пешекарвилин образованидин комитетди чи ватанэгьлидал Всеволжскдин 56-нумрадин ПУ-дин (профессиональное училище), Кировскдин 23-нумрадин ПУ-дин директорвилин къуллугъар ихтибарна. Жавабдар къуллугъар ада гьакъисагъвилелди кьилизни акъудна.
Алай вахтунда ада Кировский райондин политехнический техникумдин директордин заместителвиле кIвалахзава. Студентриз агалкьунралди тарсар, чирвилер гун патал Жалал Юлчиевич вични датIана цIийи чирвилер къачунал, алай аямдин истемишунриз жаваб гудай саягъда пешекарвилин дережа хкажунал алахънава. 2003-йисуз ада Кефердинни РагъакIидай патан технический госуниверситет куьтягьна. Санкт-Петербургдин кьилин вузра са шумудра пешекарвилин дережа хкажна, Россиядинни Европадин алай девирдин идарайра тежриба кIватIна. И серенжемри адаз образованидин къурулушда цIийи къайдаяр, алай девирдин технологияр кардик кутадай мумкинвилер гана.
Ж.Мамедов Ленинграддин областдин “Инженерный дизайн CAD” тешкилатдин кьилин эксперт я. И областдин хкягъай командадик кваз, 2016-2017-йисара ада “Жегьил пешекарар” милли чемпионатдин финалра, Абу-Дабида “WorIdSkiIIsInternationaI” тешкилатди кьиле тухвай чемпионатда иштиракна. Адан пешекарвал, бегьерлу зегьмет са шумудра чирвилер гунин идарайри, Ленинграддин областдин умуми ва пешекарвилин образованидин комитетди шабагьар гуналди къейднава. 2019-йисуз адав областдин губернатор А.Дрозденкоди “WorIdSkiIIs” тешкилат вилик тухунин кардик пай кутунай диплом вахкана.
Къейд ийин, Жалал Мамедован уьмуьрдин юлдаш Эсмира Шихвердиевани муаллим я, ада ингилис чIалан тарсар гузва. Абурухъ са руш ва пуд хтул ава. Къуй чи ватанэгьлийрихъ сагъламвал ва агалкьунар хьурай!
«Лезги газет»
