31-январдиз Ахцегь райондин Смугъулрин хуьруьн школадин гьаятда федеральный инвестпрограммадин сергьятдаваз гъвечIи футболдин майдан ачухна.
Шадвилин мярекатда Ахцегь муниципалитетдин кьил Осман Абдулкеримова, РД-дин хуьруьн майишатдин ва суьрсетдин министрдин заместитель Эмин Шайхгьасанова, РД-дин Минсельхозда недай-хъвадай затIаринни гьялдай промышленностдин хилен начальник Агъабала Агъаханова, эцигунрин подрядчик, “Барчхо” ООО-дин директор Мирза Ражабова, “Дагсельхозстрой” идарада федеральный инвестпрограммайрин управленидин начальник Али Шамилова, райадминистрациядин кьилин заместитель Вадим Агъасиева, меслятчи Алмас Шуаева, УСХ-дин начальник Арген Гьажиева, маса мугьманри (школадин варарал пионерри абур фуни ниси гваз къаршиламишна) ва школадин коллективдини хуьруьн жемятди иштиракна.
Кьилин серенжем башламишдалди вилик гьукуматдин къуллугъчиди ва мугьманри хуьруьн школадин (2019-йисуз ам РД-дин “150 школа” проектдай ремонтна) лазим техникадални алатралди таъминвилин гьал ахтармишна ва ина авай къайдадилай рази яз амукьна.
Спортдин суварин жуьреда кьиле фейи шадвилин мярекат (тамада райондин культурадин управленидин начальникдин заместитель Сулейман Сулейманов тир) ачухуниз талукь гафуна Осман Абдулкеримова мугьманарни иштиракчияр тебрикна, районэгьлийриз яшайишдин къулай шартIар таъминарунин карда эхиримжи вахтунда къазанмишнавай агалкьунрикай куьрелди лагьана ва и месэлайра куьмекунай республикадин руководстводиз чухсагъул малумарна.
— Аквазвайвал, эхиримжи йисара республикада кьилиз акъудзавай махсус программайрин ва чи алахъунрин нетижада районда гьалар вири патарихъай хъсанвилихъ дегиш жезва. Шаз Ахцегь вацIун къерехар мягькемардай бандар яна, ял ядай “Набережный” парк туькIуьрна, рекьера къир цана, школаяр ремонтна… ЦIи “РД-да хуьрерин мулкар комплекснидаказ вилик тухун” программадай Ахцегьа чIехи спорткомплекс, аялрин 60 чкадин бахча, 120 чкадин школа эцигда, цин авай линияр ремонтда ва, “Ухул-Ахцегь” цIийи турба гъуналди, райцентр хъвадай михьи целди тамамвилелди таъминарда, Луткунрин школа ишлемишиз вахкуда, хуьрерин 9 школа гуьнгуьниз хкида ва икI мад.
Гьелбетда, Смугъулрин хуьрни фикирдай акъудзавач. Шаз школадин куьгьне дарамат цIийи хъувунатIа, цIи йисан кьиляй девирдин вири истемишунрив кьур спортдин майдан (къимет — 7,5 млн. манат) ачухзава. Им Смугъулрин хуьруьн аялар, жегьилар спортдал желбдай, абурун сагъламвал мягькемардай ва спортдин дережаяр хкаждай чка жедайдал шак алач. Инал гьакI школадин линейкаяр ва маса серенжемар къулайдиз тешкилдай чкани хьанва. Чи фикир-къаст дагълух хуьрерани аялриз шегьерра хьтин кIелдай, спортдал машгъул жедай къулай шартIар яратмишун я. Смугъулрин хуьре ихьтин гуьзел имарат — гъвечIи футболдин майдан эцигай, куьмек гайи вирибур сагърай! — алава хъувуна райондин кьили.
— Дагълух и хуьре вижевай школа, спортзал, цIийи ФАП, ким аваз акуни, гила гъвечIи стадион ачухдай мумкинвал хьуни ва, и крар акваз дагъвийрин чинал хъвер алаз акуни рикI шадарзава. РФ-дин Президентди, Республикадин Кьили вилик кутазвай махсус программайрин куьмекдалди арадиз къвезвай яшайишдин объектрин, ийизвай крарин мурад-метлеб сад я — жегьилар патарихъ алат тавун патал абуруз чкайрал яшайишдин хъсан шартIар яратмишун. Къе Дагъустандин 3 миллиондив агакьна агьалийрикай 1 миллионни 100 агъзур кас 42 районда авай хуьруьн чкайра яшамиш жезва. Хъсан рекьер, тIебии газ, медицинадин, культурадин, спортдин къулай объектар ва гъилиз мажиб къведай кIвалахдай чкаяр хьайитIа, жегьилар багъри ерийра амукьда, — ачухнавай спортдин майдан мубарак авуналди, лагьана Эмин Шайхгьасанова.
— Микрофондихъ Али Шамилов атана. — Смугъула республикадин пара хуьрера авачир хьтин спортдин майдан хьуник жуван пайни кутаз алакьунал зун пара шад я. Заз чидайвал, ина боксдин секция ава, гила футболдин гужлу команда жедайдак умуд кутаз кIанзава. Алай вахтунда чна хуьруьн водоводдин проект туькIуьрзава, 2021-йисуз чна гьамни кардик кутада. Зи мурад квехъ чандин сагъвал, хизанра гьуьрмет ва хъсан вири крара агалкьунар хьун я, — лагьана А.Шамилова.
— Хуьре футболдин майдан хьунал чи виридан вил алай. Ингье райондин кьил Осман Магьмудовичан, республикадин руководстводин куьмекдалди и мурад кьилиз акъатнава. Къенин йикъалай чи аялриз футбол къугъвадай ва спортдин маса жуьрейрайни инал вердишвилер къачудай мумкинвал хьанва. За жуван ва вири смугъулвийрин мецелай квез вирибуруз сагърай лугьузва,- къейдна “Смугъулрин хуьр” СП-дин кьил Жумрид Исмаилова.
Школьникрин тIварунихъай багьа савкьатдай хуш келимаяр чкадин школадин 11-классдин ученик Гьашум Гьашумова лагьана.
Шадвилин мярекат райондин культурадин управленидин коллективдин концертдалди давамарна. Рубаба Къурбановади, Таира Муспагьовади, Зульфия Велиевади, Фаргьад Гьашумова, стхаяр тир Эмирсултан ва Мадрид Бегееври тамамарай маниярни кьуьлер гурлу капар ягъуналди кьабулна.
Дашдемир Шерифалиев
